संजय गडदे, साम टीव्ही

कोळी समाजाच्या समृद्ध खाद्यसंस्कृतीचा आणि परंपरेचा उत्सव साजरा करणारा वर्सोवा कोळी फूड फेस्टिव्हल २०२६ येत्या २३, २४ आणि २५ जानेवारी रोजी आयोजित करण्यात आला आहे. हा उत्सव वर्सोवा कोळीवाडा, अंधेरी (पश्चिम) येथील गणेश मंदिर मैदान, चर्च रोड येथे पार पडणार आहे.

या तीन दिवसीय फेस्टिव्हलमध्ये मुंबईकरांना तसेच पर्यटकांना कोळी समाजाच्या पारंपरिक जीवनशैलीचा आणि खास खाद्यपदार्थांचा अनुभव घेता येणार आहे. उत्सवात ताज्या समुद्री माशांचे, कोळंबी, खेकडे यांसह विविध प्रकारच्या सीफूड पदार्थांचे स्टॉल्स उभारण्यात येणार आहेत. पारंपरिक कोळी पाककृतींचा आस्वाद घेण्यासाठी मोठ्या संख्येने नागरिक उपस्थित राहण्याची अपेक्षा आहे.

फूड फेस्टिव्हलमध्ये केवळ खाद्यपदार्थच नव्हे तर कोळी महिलांची पारंपरिक वेशभूषा, सोनेरी दागिने, तसेच सांस्कृतिक कार्यक्रम, लोकनृत्य आणि थेट संगीत यांची रंगत पाहायला मिळणार आहे. पर्यावरण संवर्धनाचा संदेश देत केळीच्या पानांवर जेवणाची व्यवस्था करण्यात येणार असल्याचे आयोजकांनी सांगितले.

हा फेस्टिव्हल वेसावा कोळी जमात पब्लिक रिलिजस अँड चॅरिटेबल ट्रस्ट यांच्या वतीने आयोजित करण्यात आला असून, कोळी समाजाची परंपरा, संस्कृती आणि खाद्यवैभव नव्या पिढीपर्यंत पोहोचवण्याचा उद्देश या उपक्रमामागे आहे. कोळी संस्कृतीचा अनुभव, चवदार सीफूड आणि मनोरंजनाचा संगम असलेला हा उत्सव मुंबईकरांसाठी खास आकर्षण ठरणार आहे