Vasai Virar Crime News: गेल्या काही दिवसांपासून वसई विरार परिसरात एटीएम लुटण्याच्या घटना समोर येत आहेत. वसईमध्ये पुन्हा एकदा एटीएम केंद्र लुटण्याचा प्रयत्न केल्याची घटना समोर आली आहे.

वसई पश्चिमेच्या बाभोळा येथे हा प्रकार उघडकीस आला. परिसरातील एसबीआय बँकेचे एटीएम लुटण्याचा प्रयत्न मध्यरात्री झाला. मात्र यंत्र फोडता न आल्याने चोरांनी पळ काढला. या चोरीचा थरार सीसीटीव्ही कॅमेऱ्यात कैद झाला आहे. (Crime News In Marathi)

याबाबत अधिक माहिती अशी की, वसई पश्चिमेला (Vasai East) बाभोळा येथे स्टेट बँक ऑफ इंडियाचे (SBI) एटीएम केंद्र आहे. मध्यरात्री दोनच्या सुमारास चोरांच्या एक टोळीने या एटीएम केंद्रात शिरून यंत्र फोडण्याचा प्रयत्न केला. मात्र त्यांना एटीएम यंत्र फोडता आले नाही.

एटीएम केंद्रांमध्ये असलेल्या सुरक्षा यंत्रणेतून धोक्याची सूचना देणारा अलार्म वाजला. त्यामुळे चोर सावध झाले आणि त्यांनी तिथून पळ काढला. याप्रकरणी माणिकपूर पोलीस ठाण्यात चार अज्ञात आरोपींच्या विरोधात गुन्हा दाखल झाला आहे.

मध्यरात्री अडीच ते तीनच्या सुमारास ही घटना घडली. आम्हाला बँकेने उशिरा कळवले होते. आरोपी वाहनांतून आले होते. या प्रकरणी आम्ही गुन्हा दाखल केला असून तपास करत असल्याची माहिती माणिकपूर पोलीस ठाण्याचे वरिष्ठ पोलीस निरीक्षक संपतराव पाटील यांनी दिली. आरोपींच्या शोधासाठी सर्वत्र नाकाबंदी करण्यात आली आहे. (Latest Marathi News)