रश्मी पुराणिक -

मुंबई : मागील अनेक दिवसांपासून चर्चेत असणाऱ्या विधानसभा अध्यक्षपदाच्या (Assembly Speaker Election)निवडणुकीबाबत मुख्यमंत्र्यांनी (Uddhav Thackeray) मौन सोडलं आहे. विधानसभा अध्यक्ष पदाची निवडणूक व्हावी यासाठी काँग्रेस (Congress) आमदारांनी मुख्यमंत्र्यांना विनंती केली आहे.

मुख्यमंत्री आज विधिमंडळात आले तेव्हा मुख्यमंत्र्यांना भेटायला मंत्री अशोक चव्हाण, काँग्रेस प्रदेशाध्यक्ष नाना पटोले (Nana Patole) आणि काँग्रेसचे आमदार भेटायला गेले त्या भेटीत विधानसभा अध्यक्षपदाची निवडणूक व्हावी ही मागणी काँग्रेस आमदारांनी केली असता राज्यपाल मंजुरी देत नाहीत तोपर्यंत विधानसभा अध्यक्ष निवडणूक होऊ शकत नसल्याचं मुख्यमंत्री उद्धव ठाकरेंनी स्पष्ट केलं.

दरम्यान, राज्य सरकारकडून राज्यपालांना तीन वेळा शिष्टमंडळ भेटले आहे, विधानसभा अध्यक्ष निवडणुकीचा प्रस्ताव दिला पण राज्यपालांनी मंजुरी दिली नसल्याचेही मुख्यमंत्र्यांनी स्पष्ट केलं आहे त्यामुळे या ही अधिवेशनात विधान सभा अध्यक्ष निवडणूक होणाऱ्यावर प्रश्नचिन्ह कायम आहे.

तर दुसरीकडे अध्यक्षपदाच्या निवडणुकीबाबत मुख्यमंत्र्यांच्याशी चर्चा झाली असून आज उद्या सुप्रीम कोर्टात काय होते हे पहिले जाईल आणि राज्यपालांची भेट मागीतली जाईल. पण या अधिवेशनात विधानसभा अध्यक्ष पदाची निवडणूक होईल असा विश्वास नाना पटोले यांनी व्यक्त केला आहे.

Edited By - Jagdish Patil