Uddhav Thackeray Latest News: मला बऱ्याच दिवसांनी माहेरची माणसे भेटली, असं उद्धव ठाकरे म्हणाले आहेत. आज द फोटोग्राफीक सोसायटी ऑफ इंडिया आणि भारतीय विद्या भवनच्या वतीने आयोजित एकवीसाव्या पीएसआय इंटरनॅशनल फोटोग्राफी एक्सिबिशन 2023 चे उद्घाटन उद्धव ठाकरे यांच्या हस्ते संपन्न झाले. यावेळी बोलताना ते असं म्हणाले आहेत.

यावेळी बोलताना उद्धव ठाकरे म्हणाले आहेत की, ''बऱ्याच दिवसांनी माहेरची माणसे भेटली. सध्या जे काही चाललं आहे, त्यामुळे कोणाचा फोटो कधी कोणासोबत येईल, हे सांगता येत नाही. तसेच फोटो मधला एखादा कधी कोण गायब होईल, हेही सांगता येत नाही.''

उद्धव ठाकरे म्हणाले, ''येथे माझ्या नावासमोर माजी मुख्यमंत्री असं लिहिलं आहे, मात्र मी कधीही एक्स फोटोग्राफर होणार नाही. कलेचा वारसा मला माझ्या वडिलांकडून लाभला आहे.'' (Latest Marathi News)

ते म्हणाले, ''पूर्वी माझी एक मुलाखत घेण्यात आली होती. त्यावेळी मुलाखतकाराने मला विचारलं होत की, तुमचे वडील शिवसेनाप्रमुख मोठे राजकीय नेते आहेत. ते उत्तम व्यंगचित्रकार देखील आहेत. त्यांच्याकडून यापैकी एकच कोणता वारसा घ्यायचा झाला तर तुम्ही कोणता घ्याल? मी क्षणाचाही विलंब न लावता म्हटलं होत कलेचा वारसा घेणार.''

एकनाथ शिंदे यांना लगावला टोला

उद्धव ठाकरे म्हणाले, ''कला ही रक्तात असावी लागते. कलाही विकत घेतली जाऊ शकत नाही.'' ते म्हणाले, आमच्याकडच्या काही कलाकृती काही जणांनी विकत घेतल्या. मात्र कलाकार जाग्यावर असल्याने आणखी अशा कलाकृती निर्माण करू, असं म्हणत त्यांनी मुख्यमंत्री एकनाथ शिंदे यांना टोला लगावला आहे.