विकास मिरगणे, साम टीव्ही

मुंबई : कर्जत-लोणावळाजवळ शुक्रवारी सांयकाळी चार वाजता मालगाडी घसरल्याची घटना घडली आहे. मंकी हिलजवळ मालगाडी घसरल्याची माहिती मिळत आहे. यामुळं लांब पल्ल्यांच्या रेल्वे गाड्यांची वाहतूक विस्कळीत झाली आहे. मालगाडी घसरल्यामुळे मुंबई-पुणे रेल्वे मार्ग ठप्प झाला आहे. या अपघातामुळे कर्जत आणि पळसधरी येथून पुण्याकडे जाणारी रेल्वे थांबवण्यात आली आहे.

मिळालेल्या माहितीनुसार, मुंबई-पुणे रेल्वे मार्गांवर खंडाळाजवळ मंकी हिलला मालगाडी बोगीची चाके निखळून पडल्याने वाहतूक ठप्प झाली आहे. खंडाळा घाटात मंकी हिलजवळ पुण्याकडे जाणाऱ्या रेल्वेच्या सुरक्षा रक्षक बोगीची चाके निखळून पडल्याने पुण्याकडे जाणारी वाहतूक घाटात थांबवण्यात आली आहे.

मुंबईहून पूण्याकडे जाणाऱ्या मेल, एक्सप्रेस, पॅसेंजर रेल्वे आणि मालगाड्या कर्जत, पळसधरी मार्गांवर थांबवण्यात आल्या आहेत. रेल्वे प्रशासन रेल्वे ट्रॅक मोकळा करण्याचा प्रयत्न करत आहेत. मालगाडी घसरल्यामुळे सोलापूर वंदे भारत, जोधपूर हडपसर एक्स्प्रेस, कोणार्क एक्स्प्रेस, पनवेल-नांदेड एक्स्प्रेसवर परिणाम झाला आहे.

दरम्यान, मालगाडी रुळावरून घसरल्यानंतर रेल्वेचे कर्मचारी आणि अधिकाऱ्यांनी घटनास्थळी धाव घेतली. त्यानंतर स्थानिकही घटनास्थळी पोहोचले. रेल्वे कर्मचाऱ्यांनी तातडीने कामाला सुरुवात केल्याची माहिती मिळत आहे. या अपघातात कोणतीही जीवितहानी झालेली नाही. मालगाडी रुळावर आणण्याचं काम युद्ध पातळीवर सुरु करण्यात आलं आहे.