Summary -

• गोरेगावमध्ये लाईव्ह कॉन्सर्टदरम्यान भयंकर घटना

• ड्रग्जच्या ओव्हरडोसने दोन विद्यार्थ्यांचा मृत्यू

• एक तरुणीची प्रकृती गंभीर असून तिच्यावर उपचार सुरू आहेत

• पोलिसांकडून या प्रकरणाचा तपास सुरू

संजय गडदे, मुंबई

मुंबईमध्ये लाईव्ह कॉन्सर्टमध्ये ड्रग्जचा ओव्हर डोस घेतल्यामुळे २ विद्यार्थ्यांचा मृत्यू झाल्याची धक्कादायक घटना घडली. मुंबईतल्या गोरेगावमध्ये या लाईव्ह कॉन्सर्टचे आयोजन करण्यात आले होते. यामध्ये मोठ्या संख्येने तरुण-तरुणी सहभागी झाले होते. या कॉन्सर्टला आलेल्या विद्यार्थ्यांनी ड्रग्ज घेतलं होतं. पण या ड्रग्जचा ओव्हर डोस घेतल्यामुळे त्यांची प्रकृती खालवली. आज उपचारादम्यान त्यांचा मृत्यू झाला.

मिळालेल्या माहितीनुसार, मुंबईच्या पश्चिम उपनगरातील गोरेगाव परिसरात ११ एप्रिल रोजी एका लाईव्ह म्युझिक कॉन्सर्टचे आयोजन करण्यात आले होते. या कार्यक्रमासाठी तीन ते चार हजार तरुण-तरुणींनी गर्दी केली होती. या म्युझिक कॉन्सर्टदरम्यान जास्त प्रमाणात मद्यपान आणि ड्रग्ज घेतल्यामुळे काही तरुणांना त्रास झाला. त्यांची प्रकृती खालवल्यामुळे यातील २ तरुणींना मुंबईच्या जोगेश्वरी येथील हिंदू हृदय सम्राट बाळासाहेब ठाकरे ट्रामा केअर रुग्णालयात उपचारासाठी दाखल केले होते.

तर एका मुलाला गोरेगाव पश्चिमेकडील लाईफ लाईन रुग्णालयात उपचारासाठी दाखल करण्यात आले होते. लाईफ लाईन रुग्णालयात उपचार घेणाऱ्या तरुणाचा आज उपचारादरम्यान मृत्यू झाला. मात्र ट्रामा केअर रुग्णालयातील तरुणींना डिस्चार्ज दिल्यानंतर मुंबईतील एका खासगी रुग्णालयात उपचारासाठी दाखल केले होते. अखेर आज दुपारी त्यापैकी एका तरुणीचा मृत्यू झाला असून दुसरीवर अद्यापही रुग्णालयात उपचार सुरू आहे. या तरुणीची प्रकृती गंभीर आहे.

याप्रकरणी वनराई पोलिस ठाण्यात गुन्हा दाखल करण्यात आला आहे. मृत्यू झालेल्या विद्यार्थ्यांच्या रक्ताचे नमुने तपासणीसाठी पाठवण्यात आले असून अहवाल प्राप्त झाले नाहीत. या घटनेमुळे मुंबईत खळबळ उडाली. वनराई पोलिस सध्या या प्रकरणाचा तपास करत आहेत.