पुणे : पुण्यामध्ये वैद्यकीय शिक्षण घेणाऱ्या मैत्रिणींची हौसमौज करण्यासाठी एका सुशिक्षित प्रियकराने आपल्या प्रियसीसाठी एकाच दिवशी हडपसर आणि कोथरूडमधील (Hadapsar and Kothrud) नामांकित ज्वेलर्समधून अंगठ्या चोरून नेल्याचा प्रकार समोर आला आहे.

धक्कादायक बाब अशी या भावी डॉक्टर असणाऱ्या प्रियकराने आपल्या प्रेयसीला गिफ्ट देण्यासाठी या अंगठ्यांची चोरी केल्याचं उघड झालं आहे. हडपसर पोलिसांनी दोघांना अटक करून त्यांच्याकडून जवळपास अडीच लाखांच्या 4 अंगठ्या जप्त केल्या आहेत.

अनिकेत हनुमंत रोकडे रा. नागोबानगर लातुर वय 23 आणि  वैभव संजय जगताप रा. केनवड ता.रिसोड जिल्हा वाशिम वय 22 अशी अटक केलेल्या तरुणांची नावं आहेत. अनिकेत हा एका नामांकित वैद्यकीय महाविद्यालयात BAMS चे तृतीय वर्षाचे शिक्षण घेत आहे. त्याला गर्लफ्रेंडला अंगठी गिफ्ट करायची होती. तर साथीदार वैभव जगताप हा सुद्धा BSC नर्सिंगच्या तिसऱ्या वर्षात शिक्षण घेत असून या दोघांना दारूचे व्यसन असून मौजमजेसह मुलींना फिरवण्यासाठी पैशांची गरज होती.

त्यासाठी त्यांनी 8 डिसेंबरला हडपसरमधील एका ज्वेलर्समध्ये अंगठ्या खरेदीचा बहाणा केला आणि त्याठिकाणी सेल्समनकडून 3 अंगठ्या पाहण्यासाठी ताब्यात घेतल्या. मात्र, सेल्समन सोन्याचा ट्रे दुसरीकडे ठेवत असल्याची संधी साधून त्यांनी तीन अंगठ्या चोरून नेल्या. पण त्यांची ही हातचलाखी CCTV त कैद झाल्याने सगळा भांडाफोड झाला. दरम्यान हडपसर पोलीसांनी या चोरीचा तपास सुरू केला त्याच दिवशी चोरट्यांनी कोथरूडमधील ज्वेलर्समध्येही अशाच पद्धतीने चोरी केल्याचे निष्पन्न झालं.

Edited By - Jagdish Patil