Thane Water Cut For 24 Hours ठाणेकरांनो लक्ष द्या! येत्या शनिवार आणि रविवारी २४ तासांसाठी पाणी पुरवठा बंद राहणार आहे. जलवाहिनीच्या कामासाठी हा निर्णय घेण्यात आला आहे. त्यामुळे नागरिकांनी पाणी जपून वापरावे तसेच पुरेसा पाणी साठा करावा असे आवाहन अधिकाऱ्यांकडून करण्यात आले आहे.

ठाणे महानगरपालिका क्षेत्रात एमएमआरडीए मार्फत आनंद नगर ते साकेत पर्यंत एलिव्हेटेड रोडच्या कामादरम्यान, इंदिरा नगर संपकडे जाणारी ८१३ मि.मि. व्यासाची उर्ध्ववाहिनी बाधित होत असल्याने एमएमआरडीए कडून ९०० मि.मि. व्यासाची जलवाहिनी २२०० मीटर पैकी ५२० मीटर अंतरापर्यंत अंथरण्याचे काम पूर्ण झाले आहे.

एमएमआरडीएने ५२० मीटर अंतरापर्यंत अस्तित्वातील ८१३ मि.मि. व्यासाची जलवाहिनी निकामी करून नव्याने अंथरण्यात आली आहे. ९०० मि.मि. व्यासाची जलवाहिनी कार्यान्वित करण्याकरीता जलवाहिनीच्या जोडकामासाठी पाणी पुरवठा बंद ठेवण्याची मागणी केली आहे. त्यानुसार या कामाकरीता शनिवारी २७ मार्च रोजी सकाळी ९ : ०० ते रविवार, २८ मार्च रोजी सकाळी ९ : ०० वाजे पर्यंत एकूण २४ तास पाणी पुरवठा बंद राहील.

या शटडाऊन कालावधीत ठाणे महापालिके अंतर्गत इंदिरानगर, साठेनगर, आंबेवाडी, डवले नगर, सावरकरनगर, लोकमान्य नगर पाडा नं २, ३ व ४ चैत्तीनगर, परेरानगर, झांजेनगर, श्रीनगर, किसन नगर, शिवटेकडी, शांतीनगर, कैलासनगर, भटवाडी, वारलीपाडा, रूपादेवी पाडा, रामनगर, सी. पी. तलाव, येऊर परिसर इत्यादी भागाचा पाणी पुरवठा २४ तासांसाठी पूर्ण पणे बंद राहील. पाणी पुरवठा सुरू झाल्यानंतर पुढील १ ते २ दिवस कमी दाबाने पाणी पुरवठा होणार असून नागरिकांनी पाणी जपून वापरण्याचे आवाहन करण्यात आले आहे.