मनोरंजन क्षेत्रातून खळबळ उडवणारी बातमी समोर आली आहे. एका अभिनेत्रीने दहा हजारांचे आमिष दाखवून टीव्ही मालिका तसेच मॉडेलिंग क्षेत्रात काम करणाऱ्या नवोदित कलाकार तरुणींना सेक्स रॅकेटमध्ये अडकवल्याचा धक्कादायक प्रकार समोर आला आहे. याप्रकरणी अभिनेत्रीला ठाणे पोलिसांनी ताब्यात घेतले आहे. यावेळी दाेन पीडित तरुणींची सुटका केली. त्यांना महिला गृहात पाठविण्यात आले आहे.

मिळालेल्या माहितीनुसार, हिंदी मालिका आणि मॉडेलिंगमधील ज्युनिअर कलाकारांना जास्त पैशांचे आमिष दाखवून, त्यांना देह विक्रयाच्या व्यवसायात ढकलणारी अभिनेत्री दलाल म्हणून काम करत असल्याची माहिती ठाणे गुन्हे अन्वेषण विभागाच्या अनैतिक मानवी वाहतूक प्रतिबंधक विभागाला मिळाली होती. या माहितीच्या आधारे पोलिसांनी सापळा रचला.

ठरलेल्या प्लॅनिंगनुसार, पोलिसांनी एक बनावट ग्राहक आरोपीकडे पाठवले. या बनावट ग्राहकाकडून तिने ३० हजार रुपये घेतले होते. मिळालेल्या माहितीची खात्री पटल्यावर उपायुक्त अमरसिंह जाधव, सहायक पोलिस आयुक्त रवींद्र दौंडकर यांच्या मार्गदर्शनाखाली वरिष्ठ पेालिस निरीक्षक वैशाली गोरडे, उपनिरीक्षक स्नेहल शिंदे आणि हवालदार व्ही. आर. पाटील आदींच्या पथकाने २८ फेब्रुवारी रोजी दुपारी २.३५ च्या सुमारास मासुंदा तलाव परिसरात सापळा लावून अभिनेत्रीला अटक केली.

ती स्वत: काही हिंदी मालिकांमध्ये कलाकार म्हणून काम करत असून तिच्यासोबत मॉडेलिंग आणि यू ट्यूब चॅनलवर काम करणाऱ्या तिच्या ओळखीच्या काही महिला आणि तरुणींना ती शरीर विक्री करण्यासाठी प्रवृत्त करत असल्याचे चौकशीत उघड झाले. वर्षभरापासून सेक्स रॅकेट चालवित असल्याची कबुलीही तिने पाेलिसांना दिली. या घटनेने परिसरात खळबळ उडाली आहे.