संघर्ष गांगुर्डे, साम टीव्ही

ठाणे शहर गुन्हे शाखेच्या खंडणी विरोधी पथकाने मोठी कारवाई केली आहे. पथकाने खोणी गाव परिसरात अवैधरित्या चालणारी गावठी दारूभट्टी उद्ध्वस्त करत जवळपास लाखोंचा मुद्देमाल नष्ट केला आहे. या कारवाईत तब्बल ₹२,४०,२०० किमतीचा मुद्देमाल नष्ट करण्यात आल्याची माहिती समोर आली आहे. दरम्यान, या प्रकरणी मानपाडा पोलीस ठाण्यात गुन्हा दाखल करण्यात आला आहे.

२८ नोव्हेंबर २०२५ रोजी पोहवा आशिष ठाकूर यांना गुप्त बातमीदाऱ्याकडून माहिती मिळाली की, जयेश ठोंबरे (रा. खोणी गाव) हा नाल्याच्या बाजूला झाडीत मोठ्या प्रमाणात बेकायदेशीर हातभट्टीची दारू तयार करत आहे. यावर वरिष्ठांच्या मार्गदर्शनाखाली पथकाने तात्काळ छापेमारीची मोहिम राबवली.

पथकाची संयुक्त धडक सपोनि सुनील तारमळे यांच्या नेतृत्वाखाली पोहवा ठाकूर, पोहवा जाधव, चापोहवा हिवरे, पोशि वायकर यांच्यासह पथकाने दोन पंचांच्या उपस्थितीत छापा टाकला. कारवाईदरम्यान खालील मुद्देमाल जप्त आणि नष्ट करण्यात आला.

१,५०,०००/- किमतीचा गुरळमिश्रीत व नवसागरमिश्रीत वॉश — १६०० लिटर

२००/- किमतीचा नवसागर

२०,०००/- किमतीची सलेले

१०,०००/- किमतीचे प्लॅस्टिकचे इम

६०,०००/- किमतीची गावठी दारु — ३०० लिटर

एकूण नष्ट केलेला मुद्देमाल — ₹२,४०,२००

या प्रकरणी मानपाडा पोलीस ठाण्यात विविध कलमांखाली गुन्हा दाखल करण्यात आला असून, पुढील तपास मानपाडा पोलीस करत आहे. तसेच खंडणी विरोधी पथकाच्या या कारवाईचे सर्वत्र कौतुक होत आहे.