ठाणेकरांचा प्रवास खूप जलद होणार आहे. मुंबईच्या धर्तीवर आता ठाण्यातही कोस्टल रोड बांधण्यात येत आहे. कोस्टल रोडमुळे घोडबंदरवरील वाहतूक कोंडी कायमची बंद होणार आहे. सध्या घोडबंदरवरुन वाहतूक करताना एक-दीड तास वाहतूक कोंडीतच जातो. दरम्यान, आता कोस्टल रोडमुळे यापासून दिलासा मिळणार आहे. कोस्टल रोडचे काम सुरु झाले आहे.

कोस्टल रोडचे काम दोन टप्प्यात होणार आहे. बाळकुंभ ते गायमुखदरम्या १३.४५ किलोमीटरचा ६ पदरी कोस्टल रोड बांधण्यात येणार आहे. याचे काम वेगाने सुरु आहे. आठ महिन्यांपूर्वी या कोस्टल रोडचे काम सुरु केले होते. मुंबई महानगर प्रदेश प्राधिकरणाने हे काम सुरु केले होते.

आठ महिन्यातच कोस्टल रोडच्या पायाभूत कामाचे ५० टक्के काम पूर्ण झाले आहे. त्यानंतर खांबावर पिलर कॅप, गर्डर्स बसवण्याचे काम सुरु झाले आहे.

एमएआरडीएच्या मते, ठाणे कोस्टल रोड हा देशातील पहिला ग्रीनफिल्ड कोस्टल रोड प्रकल्प आहे. या प्रकल्पात पहिल्यांदाच मोनोपाइल फाउंडेशन, सिंगल पाइप या तंत्रज्ञानाचा वापर केला आहे. पर्यावर संवर्धन आणि खारफुटी क्षेत्रांचे संरक्षण करण्याचे प्राधान्य दिले जाईल.

मुंबई-नाशिक महामार्गावरील प्रवाशांना दिलासा

हा मार्ग मालवाहतूकीसाठी कयार केला जात आहे. कोस्टल रोडमुळे मुंबई-नाशिक महामार्गावरुन प्रवास करणाऱ्यांना पर्यायी मार्ग उपलब्ध होणार आहे. घोडबंदर रोडवर नेहमीच वाहनाच्या लांबच लांब रांगा असतात. भिंवडी आणि कळवा येथून घोडबंदरकडे जाणारे प्रवासी अडकतात. जर कोस्टल रोड सुरु झाला तर नाशिक, भिवंडी, गुजरात आणि मुंबई उपनगरांकडे जाणाऱ्या वाहनांना पर्यायी मार्ग मिळणार आहे.बाळकुंभ येथून थेट कोस्टल रोडवर जाता येणार आहे.

एमएमआरडीएने कोस्टल रोडला गायमुख फाउंटन हॉटेल टनेल प्रकल्पाशी जोडण्याची तयारी करत आहे. यामुळे वाधवान बंदर, जेएनपीटी, दक्षिण महाराष्ट्र आणि कर्नाटक येथे महामार्गावरु जाणाऱ्या वाहनचालकांना फायदा होणार आहे.