Mumbai : देवघरातील मूर्तींसह पूजेचे साहित्य चोरीला, मुंबई पोलिसांनी नोकराचा केला भंडाफोड, अशी केली अटक

संजय गडदे, मुंबई

मुंबईतील सांताक्रूझ परिसरातील एका घरातून देवघरातील चांदीच्या मूर्ती आणि पूजेचे साहित्य चोरी करण्यात आल्याची घटना घडली आहे. धक्कादायक म्हणजे ही चोरी घरात काम करणाऱ्या एका नोकराने केली असल्याचं उघड झालं आहे. पोलिसांनी घरातील नोकराला अटक केली असून आरोपीचे नाव शिवरंजन जगलाल असे आहे. तो चोरीनंतर फरार झाला होता. जवळपास महिनाभराच्या शोधानंतर पोलिसांनी त्याला गजाआड केले.

तक्रारदार श्रीय कोडिया या आपल्या पती निपुण आणि मुलगी श्रेणिका यांच्यासह सांताक्रूझ येथील जुहू-कोळीवाडा परिसरातील विश्रांती अपार्टमेंटमध्ये राहतात. 2023 पासून शिकुमार नावाचा नोकर त्यांच्या घरी काम करत होता. नोव्हेंबर 2025 मध्ये त्याने नोकरी सोडल्यानंतर त्याच्या शिफारशीवरून शिवरंजन याला कामावर ठेवण्यात आले होते.

10 जानेवारी रोजी सकाळी श्रीय उठल्यानंतर शिवरंजन घरात दिसला नाही. संशय आल्याने त्यांनी देवघर तपासले असता चांदीच्या सर्व देवमूर्ती व पूजेचे साहित्य चोरीस गेल्याचे आढळले. चोरीत मोठी व लहान आकाराच्या चांदीच्या दोन थाळ्या, चार वाट्या, तीन पळ्या, एक कलश, घंटा, त्रिशूल, गणेश, लक्ष्मी, कार्तिकेय यांच्या मूर्ती असा सुमारे चार लाख रुपयांचा मुद्देमाल लंपास करण्यात आला होता.

या प्रकरणी सांताक्रूझ पोलिस ठाण्यात गुन्हा दाखल करण्यात आला. तपासादरम्यान आरोपी फरार असल्याचे निष्पन्न झाले. तांत्रिक तपास व गोपनीय माहितीच्या आधारे पोलिसांनी त्याचा माग काढून अटक केली. बांद्रा येथील न्यायालयाने त्याला पोलीस कोठडी सुनावली असून चोरीचा मुद्देमाल जप्त करण्याची प्रक्रिया सुरू असल्याची माहिती पोलिसांनी दिली.