विकास काटे, ठाणे

ठाणे शहरातील वागळे इस्टेट परिसरातील किसन नगर येथे धक्कादायक घटना समोर आली आहे. साडेतीन वर्षांच्या चिमुकल्यावर त्याच्याच आईने अमानुष मारहाण केल्याची घटना घडली आहे. या घटनेमुळे परिसरात संतापाचे वातावरण निर्माण झाले असून नागरिकांकडून संबंधित महिलेवर कठोर कारवाईची मागणी केली जात आहे.

मिळालेल्या माहितीनुसार, किसन नगर येथील शाळा क्रमांक ३ मध्ये शिकणारा साडेतीन वर्षांचा मुलगा काल दुपारी आपल्या आजीसोबत जवळील शिवसेना मध्यवर्ती शाखेत गेला. यावेळी मुलाच्या शरीरावर जखमांच्या खुणा दिसून आल्या. शाखेत उपस्थित पदाधिकाऱ्यांनी त्याची विचारपूस केली असता, त्याला मारहाण करण्यात आल्याचे सांगितले. तसेच गरम उलथण्याने हात-पायांवर चटके दिल्याचेही त्याने म्हटले.

मुलाची अवस्था पाहून शिवसेना शाखाप्रमुख सुनील मोरे यांनी तातडीने पुढाकार घेतला. त्यांनी मुलाला जवळील रुग्णालयात दाखल करून त्याच्यावर आवश्यक वैद्यकीय उपचारांची व्यवस्था केली. डॉक्टरांकडून मुलाच्या प्रकृतीची तपासणी करण्यात आली असून त्याच्यावर उपचार सुरू असल्याची माहिती मिळाली आहे. घटनेचे गांभीर्य लक्षात घेऊन सुनील मोरे यांनी महिला पदाधिकाऱ्यांसह संबंधित महिलेच्या घरी भेट दिली. त्यानंतर त्या महिलेला वागळे इस्टेट पोलिसांच्या ताब्यात देण्यात आले.

या प्रकरणी पोलिसांकडे तक्रार दाखल करण्यात आली असून पुढील कायदेशीर प्रक्रिया सुरू करण्यात आली आहे. स्वतःच्या आईनेच एवढ्या लहान मुलावर अत्याचार केल्याचा आरोप समोर आल्याने स्थानिक नागरिकांमध्ये संतापाची लाट उसळली आहे.दरम्यान, वागळे इस्टेट पोलीस या प्रकरणाचा सखोल तपास करत असून पुराव्यांच्या आधारे पुढील कारवाई केली जाणार आहे.