अभिजित देशमुख, साम टीव्ही, प्रतिनिधी

वर्षभर शिवसैनिक ज्याची वाट पाहतो त्या दसरा मेळाव्याआधीच कल्याणमध्ये शिवसेना ठाकरे गट आणि शिंदे गट आमनेसामने आल्याचं पाहायला मिळत आहे. मिळालेल्या माहितीनुसार, शिवसेना उद्धव ठाकरे गटाचे इच्छुक उमेदवार साईनाथ तारे यांनी दसरा मेळाव्यासाठी सहभागी होण्यासाठी बॅनर शहरात ठिकठिकाणी लावले आहेत.

यापैकी दुर्गाडी चौकात त्यांनी लावलेले भले मोठे बॅनर अज्ञाताने फाडल्याची घटना आज शुक्रवारी दुपारच्या सुमारास घडली. याप्रकरणी तारे यांनी विरोधकांनी आपला धक्का घेतल्याने यासारखे घाणेरडे राजकरण सुरू केले असून अशामुळे निवडणुका जिंकता येणार नसल्याचं म्हटलं आहे. त्यांनी नाव न घेता शिंदे गटावर बॅनर फाडल्याचा आरोप केला आहे.

आठवडाभपरसाईनाथ तारे यांनी शिंदे गटातून ठाकरे गटात प्रवेश केला होता. विधानसभा निवडणुकीच्या पार्श्वभूमीवर साईनाथ तारे यांच्या नावाची चर्चा शहरात सुरू आहे. तारे यांनी दुर्गाडी चौकात शिवसेनेच्या शिवतीर्थावर होणाऱ्या दसरा मेळाव्यासाठी सहभागी होण्याचे आवाहन करणारे बॅनर लावले होते.

हे बॅनर दुपारच्या सुमारास फाडल्याची टाकल्याची घटना घडली आहे. याबाबत तारे यांनी दुर्गाडी चौकात मी दसरा मेळाव्याचे जाहिरात करणारे अधिकृत बॅनर लावले होते. विरोधकांनी इतका धसका घेतला आहे की, त्यांनी बॅनरच पाडले आहे. इतक्या घाणेरड्या प्रकारचे राजकारण केले जाऊ नये. विकृत विचार बुद्धीच्या लोकांनी हा जो प्रकार केला आहे, तो निंदनीय आहे. या गोष्टीची मी निंदा करतो, अशी प्रतिक्रिया दिली आहे.