ज्ञानेश्वर हिंगोलीकर, पुणे

पुणे: मराठा आरक्षणाबाबत (Maratha Reservation) वादग्रस्त विधान करणं सार्वजनिक आरोग्य व कुटुंब कल्याण मंत्री तानाजी सावंत यांना चांगलच भोवलं आहे. तानाजी सावंत (Tanaji Sawant) यांनी केलेल्या विधानाचा अनेक मराठा संघटनांनी निषेध केला असून राज्यभरातून त्यांच्यावर टीका होतेय. याबाबत आता संभाजी ब्रिगेडनेही (Sambhaji Brigade) मंत्री तानाजी सावंत यांना धारेवर धरलं आहे. मंत्री तानाजी सावंत हे मराठाद्रोही असल्याची बोचरी टीका संभाजी ब्रिगेडचे प्रदेशाध्यक्ष मनोज आखरे यांनी केली आहे. तसेच मंत्री सावंताविरोधात आंदोलन करण्याचा इशाराही संभाजी ब्रिगेडने दिला आहे. (Tanaji Sawant Latest News)

मंत्री तानाजी सावंताविरोघात संभाजी ब्रिगेड आक्रमक झाली आहे. संभाजी ब्रिगेडचे महाराष्ट्र प्रदेशाध्यक्ष मनोज आखरे म्हणाले की, "मंत्री तानाजी सावंतसारख्या मराठाद्रोही सरंजामी मराठ्यामुळेच मराठा-ओबीसीकरण रेंगाळलेले आहे. मराठा समाजाचा सरसकट ओबीसीमध्ये समावेश झाला पाहिजे ही संभाजी ब्रिगेडची गेल्या ३० वर्षांपासूनची मागणी आहे. बेताल वक्तव्य करणाऱ्या मंत्री तानाजी सावंत यांना मराठा समाज धडा शिकवेल." असा जाहीर इशारा संभाजी ब्रिगेडकडून मंत्री तानाजी सावंत यांना देण्यात आला आहे.

नेमकं काय म्हणाले होते तानाजी सावंत?

उस्मानाबाद जिल्ह्यातील एका मेळाव्यात बोलताना तानाजी सावंत म्हणाले होते की, '२०१९ मध्ये तुम्ही लोकांचा विश्वासघात करून सत्तेत आले. त्यानंतर पुढच्या ६ महिन्यांत आरक्षण गेलं, तेव्हा आंदोलन वगैरे झालं नाही, सगळे शांत बसले. पण जसंच सत्तांतर झालं की तुम्हाला आरक्षणाची खाज सुटली', असं वादग्रस्त वक्तव्य मंत्री तानाजी सावंतांनी केलं आहे, ज्यामुळे आता त्यांच्यावर सर्वत्र टीका होत आहे. (Tanaji Sawant On Maratha Aarakshan)

Edited By - Akshay Baisane