कल्याण: इंग्रजी शाळांच्या वाढत्या गर्दीत मराठी शाळा झाकून गेल्या आहेत. पालकांचा ओढा इंग्रजी शाळांकडे असल्याने गेल्या दहा वर्षांपासून मराठी शाळांना जणू घरघर लागली आहे. एकेकाळी पालक मराठी शाळांमध्ये प्रवेश घेण्यासाठी यायचे, आता मात्र मराठी (Marathi) शाळेत (School) प्रवेश घेण्यासाठी पालकांना साकडे घालावे लागत आहे. (Student search campaign of Sharda Vidyamandir School to sustain Marathi school)

हे देखील पहा -

मराठी शाळांमधील विद्यार्थ्यांची संख्या दिवसागणिक घटत असल्याने मराठी माध्यमांच्या शाळा टिकवणे हे शिक्षकांसाठी मोठे आव्हान आहे. मात्र कल्याणमधील (Kalyan) शारदा विद्या मंदिर शाळेने या आव्हानाला पेलण्याचं शिवधनुष्य हाती घेतलं आहे. या शाळेने 'विद्यार्थी शोध मोहिम' सुरु करुन मराठी शाळा टिकविण्याचा चंग बांधला आहे. शाळा सुटल्यावर शिक्षकांच्या या मोहिमेला सुरुवात होते. त्यांच्या या मोहिमेला काही प्रमाणात यश येतंय, दर वर्षाला शाळेत 100 ते 150 विद्यार्थी वाढतायत.

मराठी शाळेला विद्यार्थी मिळत नसल्याने मराठी माध्यमाच्या अनुदानित शाळांच्या तुकड्या विशिष्ट विद्यार्थी पटसंख्या नसल्याने बंद केल्या जातात. तुकड्या बंद झाल्या की, शिक्षकांची संख्या अतिरिक्त ठरते. विद्यार्थी संख्या कमी कमी होत तुकड्या बंद होत जातात. त्यामुळे शाळा सुरु ठेवायची की बंद करायची अशी स्थिती येते. ही स्थिती टाळण्यासाठी शारदा विद्यामंदीर शाळेने गेल्या पाच वर्षांपासून विद्यार्थी शोध मोहिम सुरु केली.

कोरोना काळात या मोहिमेला खंड पडला. कारण कोरोना काळात शाळा ऑनलाईन होती. आत्ता शाळा सुरु झालेल्या आहे. शाळेने मार्च महिन्यापासून विद्यार्थी शोध मोहिम सुरु केली आहे. इंग्रजी माध्यमातच नव्हे तर मातृभाषेतून शिक्षण घेतले तरी भवितव्य उज्‍जवल होते असे समुपदेशन पालक वर्गासोबत शिक्षक करतात अशी माहिती शाळेचे शिक्षक आर. डी. पाटील यांनी दिली आहे.

Edited By - Akshay Baisane