संजय गडदे, साम प्रतिनिधी

मुंबई पोलीस दलातील चालक, कारागृह अशा विविध पदांसाठी, मुंबईतील अनेक केंद्रांवर लेखी परीक्षा घेण्यात आल्या होत्या. राज्यभरातून परिक्षेसाठी हजारो विद्यार्थी आले होते. मात्र, बोरिवली पूर्वेकडील कस्तुरबा मार्ग पोलीस ठाण्याच्या हद्दीतील एका परीक्षा केंद्रावर कॉपीचा प्रकार उघडकीस आला. विद्यार्थी लेखी परीक्षेसाठी कानात ब्लूटूथ घालून आला होता. मात्र, त्याच्या संशयास्पद हालचाली पाहून त्याची झडती घेतली असता, त्याच्या कानात ब्लूटूथ आढळले. मोहम्मद शेख असं या परीक्षार्थी विद्यार्थ्यांचे नाव असून, त्याला रंगेहाथ पकडत बेड्या ठोकण्यात आल्या आहेत.

मागील दोन दिवसांपासून मुंबई पोलीस दलातील विविध पदांसाठी लेखी परीक्षा सुरू आहेत. कारागृह आणि चालक या पदांसाठी मुंबईत परीक्षा पार पडली. या परीक्षेवेळी ओशिवरा येथील रायगड मिलिटरी स्कूल या परीक्षा केंद्रावर कॉपी करण्यापूर्वीच विद्यार्थ्याला ताब्यात घेण्यात आलंय. सकाळी परीक्षा केंद्रावर सर्वच विद्यार्थी दाखल झाले असता, मोहम्मद शेख हा देखील परीक्षा केंद्रात शिरला. मात्र, त्याची संशयास्पद हालचाल तेथील पर्यवेक्षकांनी टिपली.

विद्यार्थ्याच्या संशयास्पद हालचाली पाहून, पर्यवेक्षकांनी प्रश्नपत्रिका आण उत्तरपत्रिका देण्यापूर्वी त्याची झडती घेतली. तपासणी केली असता, त्याच्या कानामध्ये मोबाईलला कनेक्ट असलेले एक ब्लूटूथ डिवाइस आढळून आले. ही धक्कादायक बाब उघडकीस आल्यानंतर पर्यवेक्षकाने त्याला परीक्षेसाठी बसण्यास मनाई केली, आणि कस्तुरबा मार्क पोलिसांच्या ताब्यात दिले.

मोहम्मद शेख या तरुणाची आरोग्य तपासणी केल्यानंतर, त्याच्यावर कस्तुरबा मार्ग पोलीस ठाण्यात गुन्हा दाखल करण्यात आला आहे. त्याच्याविरुद्ध फसवणूक तसेच महाराष्ट्र विद्यापीठ मंडळ परीक्षांमध्ये होणार्‍या गैरप्रकारास प्रतिबंध करण्याबाबतच्या अधिनियम १९८२ अन्वये गुन्हा दाखल करण्यात आला आहे. विद्यार्थ्याने हे ब्लूटूथ डिवाइस नेमकं कुणाकडून आणले? त्याच्या सोबत आणखीन कुणाचा सहभाग आहे का? यासंदर्भात कस्तुरबा मार्क पोलीस अधिकचा तपास करीत आहेत.