- रश्मी पुराणिक

मुंबई : दक्षिण मुंबई (South Mumbai) वीज पुरवठा खंडित झाल्या प्रकरणी उच्चस्तरीय चौकशीचे आदेश राज्याचे ऊर्जामंत्री डॉ. नितीन राऊत यांनी दिले आहेत. वीज पुरवठा खंडीत झाल्यानंतर स्वतः ऊर्जामंत्री डॉ. राऊत (Nitin Raut) यांनी 'ऍक्शन मोड' मध्ये येत सर्व संबंधित अधिकारी आणि टाटा कंपनीचे उच्चपदस्थ अधिकारी यांच्याशी सतत संपर्कात होते.

हे देखील पहा :

या घटनेची माहिती मिळताच राऊत हे ऊर्जा विभागाचे प्रधान सचिव दिनेश वाघमारे तसेच महापारेषण व राज्य भार प्रेषण केंद्रातील प्रमुखांशी संपर्कात होते. वीज (Electricity) पूरवठा तात्काळ पूर्ववत व्हावा यासाठी ऊर्जामंत्र्यांकडून सूचना देण्यात आल्या. टाटा कंपनीच्या उच्चपदस्थ अधिकाऱ्यांशी प्रत्यक्ष बोलून वीज पुरवठा तात्काळ सुरू होण्याबाबत चर्चा करून वरिष्ठ अधिकाऱ्यांना दुरुस्तीच्या ठिकाणी जाऊन प्रत्यक्ष कामावर देखरेख ठेवण्याच्या सूचना देण्यात आल्याचे राऊत यांनी सांगितले.

दक्षिण मुंबईतील वीज पुरवठ्यामध्ये विविध कारणांमुळे झालेला हा बिघाड दुरुस्त करून अवघ्या ७० मिनिटात पूर्ववत करण्यात आला, असे डॉ. राऊत यांनी म्हटले आहे. तसेच या प्रकरणाची गंभीर दखल घेतली असून या प्रकरणी उच्चस्तरीय चौकशीचे आदेश दिले आहेत. या चौकशीत दोषी आढळणाऱ्यावर उचित कारवाई केली जाईल असेही डॉ. राऊत यांनी जाहीर केले.

Edited By : Krushnarav Sathe