कर्जत : सर्वसामान्यांचा नाष्टा म्हणून ओळख असलेल्या वडापावमध्ये साबणाचा तुकडा आढळल्याचा प्रकार उघडकीस आला आहे. रायगड जिल्ह्यातील कर्जत रेल्वे स्थानकावर ही धक्कादायक घटना आहे. एका महिला प्रवाशासोबत हा प्रकार घडला आहे. वडापावात साबणाचा तुकडा आढळण्याच्या घटनेने प्रवाशांकडून संताप व्यक्त केला जात आहे.

कर्जत रेल्वे स्थानकावर मंगळवारी रात्री उशिरा कर्जत रेल्वे स्थानकावर एका महिला प्रवाशाने वडापाव घेतला. यामध्ये चक्क साबणाचा तुकडा आढळला. वडापावमध्ये साबण आढळल्याच्या हा प्रकार समोर आल्यानंतर प्रवाशांमध्ये संतापाची लाट उसळली आहे. कर्जत रेल्वे स्थानकाच्या प्लॅटफॉर्म नंबर २ वर असलेल्या बी. के. जैन या खाद्यपदार्थ विक्री स्टॉलमधून हा वडापाव घेतला होता.

पहिला घास घेताच त्यांना त्यामध्ये काहीतरी वेगळा घटक असल्याचा संशय आला. बघितल्यानंतर केल्यावर त्यांना वडापावमध्ये साबणाचा तुकडा आढळला. या घटनेची गंभीर दखल घेत कर्जत रेल्वे स्थानकाचे स्टेशन प्रबंधक प्रभास कुमार लाल यांनी सदर स्टॉल तातडीने बंद करण्याचे आदेश दिले आहेत.

जेवणात आढळल्या अळ्या

बुलढाण्यात काही दिवसांपूर्वी शिवभोजन केंद्रातील जेवणात अळ्या आढळल्याची घटना घडली होती. खामगाव शहरातील शासकीय रुग्णालयाजवळील शिव भोजन केंद्रात हा प्रकार घडला होता. जेवणात अळ्या आढळल्याचा व्हिडिओ सोशल मीडियावर व्हायरल झाला आहे. नागरिकांनी घेतलेल्या जेवणामध्ये अक्षरशा अळ्यांचा थर आढळल्याने जेवणाच्या दर्जाबाबत संताप व्यक्त केला जात आहे. राज्याच्या अन्न व औषध प्रशासनाने तात्काळ कारवाई करण्याची मागणी नागरिकांकडून केली जात आहे.