- अभिजित देशमुख

Kalyan News : डोंबिवली पाठोपाठ कल्याण येथे देखील पाणी प्रश्न ऐरणीवर आला आहे. भाजप पाठोपाठ आता शिवसेना देखील आक्रमक झाल्याचे पाहयला मिळत आहे. एक तर पाणी येत नाही आणि जर आलं तर दूषित पाणी येतं असे म्हणत शिवसेना शिंदे गटाने पाणी प्रश्न सोडवण्यासाठी केडीएमसीला आज आठवडाभराचा अल्टिमेटम दिला. (Maharashtra News)

गेल्या वर्षभरापासून कल्याण पश्चिमेकडील ठाणकर पाडा ,बेतूरकर पाडा, मनीषा नगर सह आसपासच्या परिसरात पाणीटंचाईची भेडसावू लागली आहे. महापालिकेच्या नियोजनहीन कारभारामुळे येथील नागरिकांना पाणी समस्या भेडसावत आहे. या भागात पाणी येत नाही आणि जेव्हा येतं ते पण दूषित येत असल्याने नागरिक त्रस्त आहेत.

आज संतापलेल्या महिलांसह शिवसेना शिंदे गटाच्या महिला पदाधिकारी नेत्रा उगले या पालिका मुख्यालयात आले. उगले यांनी संबंधित अधिकाऱ्यांना खडेबोल सूनावत पाणी देत नाही, जेव्हा पाणी देता ते दूषित असतं मग बिल कसलं घेता असा सवाल केला.

येत्या आठवड्याभरात जर पाणी समस्या सोडवली नाही तर तीव्र आंदोलन छेडण्यात येईल असा इशारा शिवसेना महिला आघाडी शहर संघटक नेत्रा उगले यांनी केडीएमसीच्या प्रशासनास दिला.

Edited By : Siddharth Latkar