मुंबई: विधान परिषदेच्या विरोधी पक्षनेतेपदी शिवसेनेचे आमदार अंबादास दानवे यांना पसंती देण्यात आली आहे. शिवसेना (ShivSena) पक्षप्रमुख उद्धव ठाकरे यांनी सोमवारी पक्षाचे आमदार अंबादास दानवे यांची महाराष्ट्र विधान परिषदेच्या विरोधी पक्षनेतेपदासाठी उमेदवारी दिली होती. या संदर्भात पक्षप्रमुख उद्धव ठाकरे यांनी काल विधान परिषद अध्यक्षांना पत्र लिहिले होते.

गेल्या महिन्यात शिवसेनेच्या (ShivSena) आमदार मनीषा कायंदे, सचिन अहिर, अंबादास दानवे, विलास पोतनीस आणि सुनील शिंदे यांच्या शिष्टमंडळाने विधानपरिषदेच्या उपसभापती नीलम गोर्‍हे यांची भेट घेऊन विरोधी पक्षनेतेपद आणि मुख्य सचेतक पदाबाबतचे पत्र दिले होते.

८ जुलैपर्यंत, ७८ सदस्यांच्या महाराष्ट्र विधान परिषदेत भाजप २४, शिवसेनेचे १२ आणि काँग्रेस राष्ट्रवादी काँग्रेस पक्षाचे (NCP) प्रत्येकी १० सदस्य आहेत. चार अपक्ष, तर विधान परिषदेच्या १५ जागा रिक्त आहेत. अंबादास दानवे विरोधी पक्षनेते झाले आहेत. मुख्यमंत्री आणि विरोधी पक्षनेते एकाच पक्षाचे पण विधानपरिषदेत वेगवेगळे गट असल्याचे दुर्मिळ उदाहरण ठरणार आहे. विधानसभेतील विरोधी पक्षनेते राष्ट्रवादी काँग्रेसचे अजित पवार आहेत.

विधान परिषद विरोधी पक्षनेते पदासाठी काँग्रेसनेही दावा केला होता. पण विधान परिषदेत काँग्रेसचे संख्याबळ कमी असल्यामुळे हे पद शिवसेनेकडे गेले आहे. तर दुसरीकडे या अगोदर राष्ट्रवादीनेही दावा केला केला होता.

तब्बल ३९ दिवसांनंतर शिंदे सरकारने मंत्रिमंडळाचा विस्तार केला आहे. पहिल्या टप्प्यात आज भाजप आणि शिंदे गटातील एकूण १८ आमदारांनी मंत्रिपदाची शपथ घेतली आहे. मंत्रीपदाची शपथ घेतलेल्या मंत्र्यांच्या नावे खालीलप्रमाणे -

भाजपकडून कुणी घेतली मंत्रिपदाची शपथ

गिरीश महाजन, चंद्रकांत पाटील, सुधीर मुनगंटीवार,सुरेश खाडे, राधाकृष्ण विखे पाटील, अतुल सावे, रवींद्र चव्हाण, विजयकुमार गावित, मंगलप्रभात लोढा.

शिंदे गटाकडून कुणी घेतली शपथ

तानाजी सावंत, उदय सामंत, संदीपान भुमरे, दादा भुसे, शंभूराज देसाई, अब्दुल सत्तार, दीपक केसरकर, संजय राठोड, गुलाबराव पाटील.