मयूर राणे, साम टीव्ही

मुंबई: विक्रोळीमध्ये ठाकरे गटाच्या एका शिवसैनिकाचा संशयास्पद मृत्यू झाल्याची धक्कादायक घटना घडली आहे. चेतन ठाकूर असे या मृत शिवसैनिकाचे नाव असून रुग्णालयात उपचारादरम्यान त्यांचा मृत्यू झाला आहे. या घटनेमुळे राजकीय वर्तुळात मोठी खळबळ उडाली असून शिवसैनिकांनी संताप व्यक्त केला आहे. चेतन ठाकूर हे विक्रोळीच्या कन्नमवार नगर परिसरात वास्तव्यास होते. काल रात्री त्यांना ताप आल्याने त्यांना उपचारासाठी आदी आरोग्य या खासगी रुग्णालयात दाखल करण्यात आले होते. मात्र उपचार सुरू असतानाचत्यांचा मृत्यू झाला. यानंतर मृताच्या नातेवाईकांनी रुग्णालयातील डॉक्टरांवर गंभीर हलगर्जीपणाचे आरोप केले आहेत.

घटनेनंतर संतप्त नातेवाईक, मित्रमंडळी तसेच शिवसेना (उबाठा) पक्षाचे पदाधिकारी आणि कार्यकर्ते यांनी रुग्णालयात मोठा गोंधळ घातला. संबधित रुग्णालयाविरोधात गुन्हा दाखल करण्याची मागणी करण्यात आली. दरम्यान, आमदार सुनील राऊत यांनीही या प्रकरणात आक्रमक भूमिका घेत रुग्णालयावर कारवाई करण्याची मागणी केली आहे. या रुग्णालयात वारंवार अशा घटना घडत आहेत. गेल्या वर्षी दहीहंडीच्या वेळी पडलेल्या एका तरुणाला पालिका रुग्णालयाने मृत घोषित केले होते. मात्र या खासगी रुग्णालयाने त्याच्यावर उपचार सुरू ठेवल्याचा आणि काही दिवसांनी लाखोंचे बिल करून मृत घोषित केल्याचा आरोप आहे, असे राऊत यांनी सांगितले.

तसेच संबंधित रुग्णालय पालिकेच्या ताब्यात देण्याची मागणीही त्यांनी केली आहे. मात्र, रुग्णालय प्रशासनाने सर्व आरोप फेटाळून लावले असून कोणतीही हलगर्जीपणा झालेला नसल्याचे स्पष्ट केले आहे. या घटनेनंतर कायदा व सुव्यवस्था राखण्यासाठी रुग्णालय परिसरात मोठा पोलिस बंदोबस्त तैनात करण्यात आला आहे. पुढील तपास सुरू असून या प्रकरणाकडे सर्वांचे लक्ष लागले आहे.