मृत्यूशी झुंज अखेर संपली! दहीहंडी फोडताना चौथ्या थरावरून डोक्यावर पडला; पवईच्या गोविंदाचा उपचारादरम्यान मृत्यू

आठवड्याभरापूर्वी दहीहंडी सण जल्लोषात साजरा करण्यात आला होता. मात्र, थर लावताना अनेक गोविंदा जखमी झाले आणि मुंबईत दोन गोविंदांचा मृत्यूही झाला. या दोन मृत्यूंमुळे उत्सवाच्या आनंदाला गालबोट लागले असतानाच, आता आणखी एका गोविंदाचा मृत्यू झाल्याची धक्कादायक घटना समोर आली आहे.

आनंद सुरेश दांडगे (वय वर्ष २६) असे मृत गोविंदाचे नाव आहे. तो पवईतील रहिवासी होता. आनंद गोखलेनगर गोविंदा पथकाचा सदस्य होता. विक्रोळीतील कन्नमवार नगरमध्ये आमदार सुनील राऊत यांच्यावतीने भव्य दहीहंडी उत्सवाचे आयोजन करण्यात आले होते. २५ लाखांच्या हंडीत त्याने सहभाग घेतला होता. मात्र, चौथ्या थरावरून उतरताना तो खाली कोसळला आणि गंभीर जखमी झाला.

त्याला तातडीने उपचारासाठी खासगी रूग्णालयात पुढील उपचारासाठी दाखल करण्यात आले. आठवडाभर त्याच्यावर उपचार सुरू होता. मात्र, आज आठवड्यानंतर त्याचा मृत्यू झाला. त्याची मृत्यूशी झुंज अपयशी ठरली. मृत्यूची बातमी कळताच दांडगे कुटुंबावर दुखा:चा डोंगर कोसळला आहे. तसेच परिसरातील नागरिकांनीही शोक व्यक्त केला आहे.

मानखुर्दमधील गोविंदाचा मृत्यू

मुंबईच्या मानखुर्दमधील गोविंदाचा आठवडाभरापूर्वी मृत्यू झाला होता. तो बाल गोविंदा पथकातील सदस्य होता. दहीहंडीसाठी दोरी बांधताना त्याचा तोल गेला आणि तो खाली कोसळला. उंचावरून खाली पडल्यामुळे त्याचा मृत्यू झाला. जगमोहन शिवकिरण चौधरी असे मृत गोविंदाचे नाव आहे. त्याच्या मृत्यूनंतर परिसरातील नागरिकांनी शोक व्यक्त केला.