ही दृश्यं आहेत पिंपरी चिंचवडच्या दिघीतील एका सोसायटीतील लिफ्टमधली.... लिफ्टमध्ये सोसायटीचे रहिवासी शिरतात... त्यात दोन महिला.. त्यांच्या हाती दोन चिमुकली बाळं... लिफ्टचं दार बंद होतं... चिमुकली खेळता खेळता लिफ्टच्या दारावर हात ठेवते..

लिफ्ट वरच्या मजल्यावर पोहोचते... दार उघडतं...आणि पुढच्याच क्षणी थरकाप उडवणारी घटना घडते...लिफ्टच्या दारावर ठेवलेलं चिमुकलीचा हात दरवाजाच्या फटीत अडकला आणि चिमुकली किंचाळली तेव्हा दुर्घटना घडल्याचं सर्वांना कळलं....त्यामुळे लिफ्टमधल्या सर्वांचाच थरकाप उडाला...

चिमुकलीचा अडकलेला हात बाहेर काढण्यासाठी सर्वांचीच धावाधाव झाली. कुणी तिचा अडकलेला हात बाहेर काढण्याचा प्रयत्न करत होतं...तर कुणी लिफ्टचा दरवाजा बाहेर ओढत होतं...मात्र हे सारं सुरू असताना चिमुकलीच्या जिवाचा आंकांत होत होता...अखेर सर्वांच्या प्रयत्नांमुळे चिमुकलीचा हात बाहेर काढण्यात यश आलं.

पालकांनी आपल्या लहान मुलांना लिफ्टमधून नेताना खबरदारी घेण्याची कशी गरज आहे हे या घटनेमुळे अधोरेखित झालंय.