अक्षय बडवे, पुणे

माजी आमदार रवींद्र धंगेकर यांनी काँग्रेसला धक्का देत शिवसेना शिंदे गटामध्ये प्रवेश केला. पण रवींद्र धंगेकरांच्या प्रवेशामुळे पुण्यात महायुतीमध्ये तेढ निर्माण झाली आहे. धंगेकरांच्या येण्यामुळे भाजपमध्ये तीव्र नाराजी पाहायला मिळत आहे. तर शिंदेसेना सावध असल्याचे दिसून येत आहे. सोमवारीच रवींद्र धंगेकर यांनी उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला.

मिळालेल्या माहितीनुसार, रवींद्र धंगेकर यांच्या प्रवेशावरून पुण्यात भाजपमध्ये नाराजी तर शिंदेसेना सावध असल्याचे पाहायला मिळत आहे. आतापर्यंत ४ वेळा पक्ष बदलेल्या रवींद्र धंगेकर यांनी शिवसेनेत प्रवेश केल्यावर आता युती धर्म कसा पाळायचा? असा सवाल भाजपमधील पदाधिकाऱ्यांनी उपस्थित केला आहे. भाजप आणि मुख्यमंत्री देवेंद्र फडणवीस यांच्यावर जोरदार टीका करणारे जर आता युतीमध्ये आले असतील तर त्यांच्याशी जुळवणी कशी करायची, अशी नाराजी भाजप पदाधिकाऱ्यांनी व्यक्त केली.

पुणे शहरातील भाजप पदाधिकाऱ्यांकडून व्हॉट्सॲप ग्रुपवर रवींद्र धंगेकर यांच्या प्रवेशावर निषेध व्यक्त केला आहे. दुसऱ्या बाजूला नुकताच शिवसेनेत प्रवेश केल्यानंतर रवींद्र धंगेकर यांना पुणे म्हाडाच्या पुणे विभागाचे अध्यक्षपद मिळणार अशी चर्चा देखील सुरू झाली आहे. पक्षात येताच पद मिळणार या चर्चेमुळे शिवसेनेतील शिलेदारसुद्धा सावध झाले असल्याची विश्वसनीय सूत्रांनी माहिती दिली आहे.