सुशांत सावंत -

मुंबई : केंद्रीय मंत्री नारायण राणे आणि आमदार नितेश राणे यांना दिंडोशी कोर्टाकडून अंतरिम दिलासा मिळाला आहे. कारण या दोघांना १० तारखेपर्यंत अटक न करण्याचे कोर्टाने आदेश दिले आहेत. काही दिवसांपासून राणे पिता-पुत्रांवरती (Narayan Rane and BJP MLA Nitesh Rane) अटकेची टांगती तलवार होती कारण नारायण राणे आणि नितेश राणे यांच्या विरोधात मालवणी पोलीस (Police) स्थानकात FIR दाखल करण्यात आला होता. त्यानंतर राणे यांना मालवणी पोलिसांनी चौकशीला हजर रहाण्याची नोटीस बजावली होती.

त्यामुळे दिशा सालीयन प्रकरणी त्यांना अटक होतेय की काय अशी शक्यता असतानाच आता त्यांना १० तारखेपर्यंत त्यांना अटक न करण्याचे कोर्टाचे आदेश दिल्याने त्यांना दिलासा मिळाला आहे. मात्र उद्या नितेश राणेंना १ वाजता मालवणी पोलिस ठाण्यात हजर राहण्यास कोर्टाने सांगितलं आहे.

केंद्रीय मंत्री नारायण राणे यांनी काही दिवसांपूर्वी पत्रकार परिषद घेतली होती यामध्ये त्यांना सुशांत सिंग राजपूत आणि दिशा सालियन (Disha Salian) यांची हत्या झाल्याचा गंभीर आरोप केला होता. तसंच दिशा सालियानवर लैंगिक अत्याचार झाल्याचा आरोप त्यांनी या पत्रकार परिषदेत केला होता आणि त्यांच्या याच वक्तव्यांमुळे दिशाच्या आईने मालवणी पोलीस ठाण्यात गुन्हा दाखल केला होता. आणि त्यानंतर मालवणी पोलिसांनी नितेश राणे यांनी ३ मार्च तर नारायण राणेंना ४ मार्च रोजी हजर राहण्यास सांगितले होते.

Edited By - Jagdish Patil