रेल्वेने प्रवास करणाऱ्या प्रवाशांसाठी दिलासादायक बातमी आहे. आता दादर स्थानकातून रोज १० लोकल फेऱ्या सुरु होत आहेत. सीएसएमटीहून सुटणाऱ्या लोकलमध्ये दादर येथे प्रवाशांना चढता येत नसल्याने हा महत्त्वाचा निर्णय घेण्यात आला आहे. रोज दादर येथे प्रवाशांना लोकलमध्ये चढता येत नसल्याच्या तक्रारी वारंवार प्रवासी रेल्वे प्रशासनाकडे करतात. त्याचीच दखल घेत हा महत्त्वाचा निर्णय घेण्यात आला आहे. (Railway New Timetable)

परळच्या रेल्वे स्थानकातून अतिरिक्त १४ लोकल फेऱ्या सुरु होणार आहेत. ऑगस्टच्या पहिल्या आठवड्यापासून हे नवं वेळापत्रक लागू होणार आहे.जलद लोकलच्या १० फेऱ्या या सीएसएमटीऐवजी दादरवरुन सुटणार आहेत. त्यामुळे प्रवाशांचे हाल होणार नाहीत.

या नव्या वेळापत्रकानुसार, सीएसएमटी ते ठाणे अशा ६ लोकल फेऱ्या कल्याणपर्यंत वाढवण्यात आल्या आहेत.दादरमधून सुटणाऱ्या २४ धीम्या लोकल आता परळमधून सुटणार आहे. त्याऐवजी दादरमधून १० जलद लोकल सुटणार आहेत.या नवीन वेळापत्रकानुसार हार्बर लाइनच्या लोकल फेऱ्यांमध्ये कोणताही बदल करण्यात आलेला नाही.

सीएसएमटीहून सुटणाऱ्या लोकल या प्रवाशांनी खचाखच भरलेल्या असतात. त्यामुळे दादर रेल्वे स्थानकावर प्रवाशांना चढायला मिळत नाही. त्यामुळे प्रवाशांना खूप वेळ रेल्वे स्थानकावरच थांबावे लागते. प्रवाशांचे प्रचंड हाल होतात. त्याच पार्श्वभूमीवर रेल्वे प्रशासनाने हा महत्त्वाचा निर्णय घेतला आहे.