मुंबई-पुण्यात स्वतः चे घर असावे, अशी अनेकांची इच्छा असते. मुंबई पुण्यातील घरे खूप महाग आहेत. त्यामुळे सर्वसामान्यांसाठी म्हाडा दरवर्षी घरांसाठी लॉटरी काढते.याचसोबत पीएम आवास योजनेअंतर्गत घरांसाठी सब्सिडी मिळते. दरम्यान, पुणेकरांसाठी आनंदाची बातमी आहे. पुणेकरांना आणखी ४ हजार घरे मिळणार आहेत. (PM Awas Yojana)

प्रधानमंत्री आवास योजनेअंतर्गत महापालिकेकडून दुसऱ्या टप्प्यात चार हजारांहून अधिक फ्लॅट बांधण्यात येणार आहे. बालेवाडीसह मुंढवा, धानोरी व वडगाव अशा वेगवेगळ्या भागांत या सदनिका बांधण्यात येणार आहेत.

मुख्यमंत्री देवेंद्र फडणवीसांनी व्हिडिओ कॉन्फरन्सिंगच्या माध्यमातून प्रधानमंत्री आवास योजनेचा आढावा घेतला. त्यानंतर त्याला गती देण्याच्या सूचना महापालिका प्रशासनाला केल्या आहेत.

सर्वांना हक्काचे घर मिळावे यासाठी केंद्र सरकारने पंतप्रधान मंत्री आवास योजना हाती घेतली आहे. या योजनेअंतर्गत पुणे महापालिकेकडून पहिल्या टप्प्यात २६५८ इतक्या सदनिका बांधण्यात आल्या आहेत. त्यामध्ये हडपसर येथे तीन, खराडी येथे एक आणि वडगाव येथे १ असा चार प्रकल्पांचा समावेश आहे. आर्थिकदृष्ट्या दुर्बल घटकांना ही घरे देण्यात आली असून आठ ते दहा लाख रुपयांपर्यंत या घरांच्या किंमती आहेत.

म्हाडाची लॉटरी

म्हाडाची घरेदेखील खूप स्वस्त असतात. २९ जानेवारी रोजी म्हाडाच्या घरांची सोडत प्रक्रिया सुरु होणार आहे. गृहनिर्माण क्षेत्र विकास मंडळाच्या पुणे मंडळाने ऑक्टोबर महिन्यात जाहीर केलेल्या घरांची सोडत झाली आहे. ही प्रक्रिया ऑनलाइन पद्धतीने पार पडली. यामध्ये ६,४२० घरांसाठी सोडत करण्यात आली आहे. यासाठी ९३६६२ अर्ज प्राप्त झाले आहेत.