Pune Water Dam Storage Update News राज्याला गेल्या ८ दिवसात मुसळधार पावसाने झोडपून काढले. या पावसाने मागील २ महिन्यांपासून सुरु असलेल्या पाण्याच्या समस्येने हैराण झालेल्या नागरिकांना दिलासा दिला आहे. पुण्याच्या खडकवासला धरण क्षेत्रातील पाणीसाठ्यात गेल्या आठवडाभरात मोठी वाढ झाली असून पुणे शहराला पाणीपुरवठा करणाऱ्या चार प्रमुख धरणांमध्ये एकूण १६ टीएमसी पाणीसाठा उपलब्ध झाला आहे. धरणक्षेत्रात झालेल्या दमदार पावसामुळे अवघ्या आठ दिवसांत तब्बल १३ टीएमसी पाणीसाठ्याची वाढ नोंदवण्यात आली आहे. त्यामुळे पुणेकरांना दिलासा मिळाला असला, तरी गेल्या वर्षीच्या तुलनेत साठा अद्याप कमी असल्याचे चित्र आहे.

सध्या खडकवासला धरण (Khadakwasla Dam Storage Update) प्रकल्पातील एकूण पाणीसाठा १६ टीएमसी इतका असून तो एकूण क्षमतेच्या ५४.८९ टक्के आहे. गेल्या वर्षी याच दिवशी धरणक्षेत्रात १९.८१ टीएमसी म्हणजेच ६७.९७ टक्के पाणीसाठा उपलब्ध होता. यामुळे यंदा अजूनही सुमारे ३ टीएमसी पाणीसाठ्याची तूट असल्याचे दिसून येत आहे.

धोरणानुसार पाणीसाठ्याचा विचार केला असता, खडकवासला धरणात १.९६ टीएमसी, पानशेत धरणात ६.०१ टीएमसी, वरसगाव धरणात ६.७० टीएमसी तर टेमघर धरणात १.३३ टीएमसी पाणी साठले आहे. धरणक्षेत्रात सुरू असलेल्या पावसामुळे पाणीसाठ्यात सातत्याने वाढ होत आहे. येत्या काही दिवसांत पावसाचा जोर कायम राहिल्यास साठ्यात आणखी वाढ होण्याची शक्यता जलसंपदा विभागाने व्यक्त केली आहे.

दरम्यान, धरणातील पाण्याची पातळी झपाट्याने घटत असल्याने खडकवासला धरणाच्या सांडव्यावरून मुठा नदीपात्रात सुरू असलेला विसर्ग पूर्णपणे बंद करण्यात आला आहे. जलसंपदा विभागाने दिलेल्या माहितीनुसार, काल रात्री १०.३० वाजता ६,२९६ क्युसेक वेगाने सुरू असलेला पाण्याचा विसर्ग थांबवण्यात आला. मात्र, पुढील काळात धरणक्षेत्रातील पावसाचे प्रमाण आणि धरणात होणारी पाण्याची आवक लक्षात घेऊन विसर्ग पुन्हा सुरू करण्याचा किंवा त्यामध्ये वाढ-कपात करण्याचा निर्णय घेतला जाऊ शकतो. त्यामुळे नदीकाठच्या नागरिकांनी सतर्क राहण्याचे आवाहन प्रशासनाने केले आहे.