Mumbai : मुंबईत धावत्या लोकलवर दगडफेक; तरुणाचा व्हिडिओ व्हायरल, कठोर कारवाईची मागणी

विकास मिरगणे, नवी मुंबई

मुंबई लोकल म्हटलं की गर्दी, धक्काबुक्की आणि प्रवाशांच्या सुरक्षेचा प्रश्न कायमच चर्चेत असतो. गेल्या काही काळात लोकलमधून पडून प्रवाशांचा मृत्यू झाल्याच्या घटना समोर येत असतानाच आता रेल्वेच्या सुरक्षेला थेट धोका निर्माण करणारा एक व्हिडिओ सोशल मीडियावर व्हायरल झाला आहे. नवी मुंबईतील दिघा परिसरात एका तरुणाने धावत्या रेल्वेवर दगडफेक केल्याचे पाहायला मिळत आहे.

व्हायरल झालेल्या व्हिडिओनुसार, एक तरुण रेल्वेच्या दिशेने दगडफेक करताना दिसत आहे. एवढेच नव्हे, तर दगडफेक केल्यानंतर रेल्वेतील प्रवाशांकडे अश्लील हातवारे करत असल्याचेही व्हिडिओमध्ये दिसून येत आहे. हा तरुण इथेच थांबला नाही तर, त्याने या संपूर्ण प्रकाराचा व्हिडिओ स्वतःच रेकॉर्ड करून तो सोशल मीडियावर रीलच्या माध्यमातून व्हायरल केला आहे. या तरुणाचे नाव अजय शिंदे असल्याचे सांगितले जात आहे. मात्र, त्याची अधिकृत ओळख आणि व्हिडिओबाबत रेल्वे पोलिसांकडून अधिकृत माहिती समोर आलेली नाही. त्यामुळे संबंधित व्हिडिओची पडताळणी करून दोषी व्यक्तीवर योग्य ती कायदेशीर कारवाई करणे आवश्यक असल्याची मागणी होत आहे.

धावत्या रेल्वेवर दगडफेक करणे हा केवळ गैरप्रकार नसून त्यामुळे प्रवाशांच्या जीवाला गंभीर धोका निर्माण होऊ शकतो. दगड खिडकीतून आत गेला तर प्रवासी जखमी होण्याची शक्यता असते. तसेच चालक किंवा रेल्वेच्या महत्त्वाच्या भागाला दगड लागल्यास मोठा अपघात होण्याचा धोका निर्माण होऊ शकतो.

या पार्श्वभूमीवर रेल्वे पोलिसांनी व्हायरल व्हिडिओची तातडीने दखल घेऊन संबंधित तरुणाचा शोध घ्यावा आणि दोषी आढळल्यास त्याच्यावर कठोर कारवाई करावी, अशी मागणी प्रवाशांकडून होत आहे. सोशल मीडियासाठी धोकादायक कृत्यांचे रील बनवण्याचा वाढता प्रकार रोखण्यासाठीही प्रशासनाने कडक पावले उचलण्याची गरज व्यक्त केली जात आहे.