सागर आव्हाड, साम टीव्ही

Pune Road Accident : पुण्यात अपघाताची धक्कादायक घटना घडली आहे. पुणे - सोलापूर महामार्गावर उरुळी कांचन ग्रामपंचायत हद्दीतील तळवाडी चौकात अपघाताची ही दुर्दैवी घटना घडली आहे. रस्ता ओलांडणाऱ्या एका 50 वर्षीय महिलेला डंपरने दिलेल्या धडकेत जागीच मृत्यू झाल्याची घटना घडली. पुणे-सोलापूर महामार्गावर सकाळी पावणे बारा वाजण्याच्या सुमारास ही घटना घडली आहे.

प्रमिला अशोक गोळे असे अपघातात मृत्यू झालेल्या महिलेचे नाव आहे. सदर महिला ही उरुळी कांचनचे माजी पोलीस पाटील अशोक गोळे यांच्या पत्नी असल्याची माहिती मिळाली आहे. प्रमिला यांच्या मृत्यूने उरुळी कांचन गावात खळबळ उडाली आहे. मिळालेल्या माहितीनुसार, प्रमिला गोळे यांना उरुळी कांचन ग्रामपंचायत हद्दीतील तळवाडी चौकातून रस्ता ओलांडून शिंदवणे रस्त्याकडे जायचं होतं. मात्र रस्त्यावर वाहतूक मोठी होती. त्यामुळे त्या रस्त्याच्या बाजूला उभ्या राहिल्या होत्या.

रस्त्याच्या बाजूला उभ्या राहिलेल्या असताना सोलापूर उरुळी कांचन गावातून एक डंपर हा महामार्गावरून यवतच्या बाजूने निघाला होता. कंटेनर वळण घेत असताना रस्त्याच्या बाजुला उभ्या राहिलेल्या प्रमिला गोळे यांना डंपरने जोरदार धडक दिली, अशी माहिती स्थानिक नागरिकांनी दिली.

दरम्यान, या अपघातात त्यांना मोठ्या जखमा झाल्या होत्या. स्थानिक नागरिकांच्या मदतीने त्यांना तात्काळ उरुळी कांचन येथील सिद्धिविनायक हॉस्पिटल या ठिकाणी दाखल करण्यात आलं. मात्र, डॉक्टरांनी तपासून उपचारापूर्वीच त्यांचं निधन झाल्याचं सांगितलं. सदरचा डंपर हा कोरेगाव मूळ (ता. हवेली) येथील बोधे काकडे वस्ती येथील असल्याची माहिती मिळाली आहे.

कोथरुड परिसरात भीषण अपघात

पुण्यातील कोथरूड परिसरात अपघात झाला आहे. कोथरूड परिसरात असणाऱ्या वेद भवन येथील पुलावर ३ ते ४ वाहनांचा अपघात झाला. भरधाव वाहने एकमेकांना धडकली. या अपघातात दोन जण जखमी झाले. अपघातानंतर जखमींना जवळच्या रुग्णालयात दाखल केलं आहे. सुदैवाने अपघातात कुठलीही जीवितहानी झालेली नाही. अग्निशमन दलाचे जवानांनी वेळेत अपघातस्थळी पोहोचून स्थिती नियंत्रणात आणली आहे.