अक्षय बडवे, पुणे

पुण्यामध्ये ट्रॅफिक पोलिस आणि कॅब चालकांनी भररस्त्यात राडा केल्याची घटना समोर आली आहे. ट्रॅफिक पोलिसाने आपल्या कारला कट मारून गेल्याच्या रागातून कॅब चालकाने त्यांना जाब विचारत शिवीगाळ केली. यानंतर संतप्त झालेल्या ट्रॅफिक पोलिसाने या कॅब चालकाला मारहाण केली. या कॅब चालकाने ट्रॅफिक पोलिसाचा व्हिडीओ काढला. हा व्हिडीओ सध्या सोशल मीडियावर व्हायरल होत आहे.

मिळालेल्या माहितीनुसार, पुण्यातील रेल्वे स्टेशन समोरील रस्त्यावर आज सकाळी कॅब आणि एका वाहनाचा किरकोळ अपघात झाला. त्यामुळे कॅब चालकाने कार रस्त्याच्या कडेला उभी करून ते दोघे भांडत होते. त्याच वेळी त्याठिकाणी ट्रॅफिक पोलिस आपल्या कारमधून आले. त्यांनी या कॅब चालकाला 'तू ट्रॅफिक अडवून लोकांना त्रास देत आहे', असं सांगितलं. त्यावरून कॅब चालक आणि ट्रॅफिक पोलिस यांच्यात वाद सुरू झाला.

संबंधित ट्रॅफिक पोलिस आणि कॅब चालक यांच्यामध्ये जोरदार भांडण सुरू झाले. जाब विचारत असलेल्या ट्रॅफिक पोलिसाने कॅबला कट मारून जाण्याचा प्रयत्न केला. तेव्हा कॅब चालकाने ट्रॅफिक पोलिसाला शिवी दिली. त्यामुळे संतप्त झालेल्या ट्रॅफिक पोलिसाने आपली कार रस्त्यात थांबवून कॅब चालकाला मारहाण केली. कॅब चालाकाने या घटनेचा व्हिडीओ आपल्या मोबाईलमध्ये कैद केला. ट्रॅफिक पोलिस आणि कॅब चालकाचा हा वाद सध्या पुण्यात चर्चेचा विषय ठरला आहे. हा व्हिडीओ व्हायरल होत आहे.