पुण्याच्या खडकीतून धक्कादायक घटना उघडकीस आली आहे. घटस्फोटाची केस सुरू असताना नवऱ्याकडून पत्नीवर जीवघेणा हल्ला केल्याची धक्कादायक घटना घडली आहे. जयंती कार्यक्रमादरम्यान घडलेल्या या प्रकारात महिलेवर चाकूसदृश धारदार हत्याराने वार करण्यात आले आहेत. या घटनेत महिला गंभीर जखमी झाली आहे. या प्रकरणी खडकी पोलिसांनी आरोपी पतीला अटक केली आहे.

अटक करण्यात आलेल्या आरोपीचे नाव राहुल महादेव कांबळे (30) असे आहे. नवऱ्याने हल्ला केल्यानंतर सायली सयाजी भिसे (वय २२) हिने खडकी पोलीस ठाण्यात फिर्याद दाखल केली आहे. सायली भिसे आणि राहुल कांबळे यांचा काही महिन्यांपूर्वी आळंदी येथे विवाह झाला होता. त्यांच्या लग्नाचा व्हिडिओ सोशल मीडियावर व्हायरल झाल्याने ते चर्चेत आले होते. मात्र, वैवाहिक वादामुळे दोघे वेगळे राहत होते. त्यांचा घटस्फोटाचा खटला न्यायालयात प्रलंबित आहे.

त्या दिवशी नेमकं काय घडलं?

१४ एप्रिल रोजी डॉ. बाबासाहेब आंबेडकर जयंतीनिमित्त औंध रोडवरील चौकातील आयोजित कार्यक्रमाला सायली भिसे ही तिच्या मैत्रिणीसोबत उपस्थित होती. कार्यक्रम संपल्यानंतर रात्री घरी परतत असताना सुमारे पावणे बारा वाजण्याच्या सुमारास राहुल कांबळे त्यांच्या समोर आला. यावेळी त्याने सायली यांना मारहाण करण्यास सुरुवात केली. त्यांनी प्रतिकार केल्यावर आरोपीने चाकूसारख्या धारदार हत्याराने कपाळ, गाल, खांदा, पाठ आणि ओठाखाली वार करत त्यांना जखमी केले. या प्रकरणी खडकी पोलीस अधिक तपास करत आहेत.

सायली भिसेने काय आरोप केला?

सायलीने म्हटलं की, राहुल महादेव कांबळे विरोधात गुन्हा दाखल केलं आहे. त्याला पोलिसांनी ताब्यात घेतलंय. पण त्याच्याविरोधात कोणतीही कडक कारवाई करण्यात आलेली नाही. पोलिसांत गुन्हा दाखल करून काही उपयोग झालेला नाही. त्याच्या विरोधात योग्य असे गुन्हे दाखल केलेले नाहीत. त्याला कोणाचा पाठिंबा मिळतोय, हे मला माहीत नाही. आमची शिवाजीनगर कोर्टात घटस्फोटाची केस सुरू आहे. त्याला सही करायची नाही, त्याचा राग काढत आहे'.