रोहिदास गाडगे, साम टीव्ही

पुणे जिल्ह्याच्या शिरूर तालुक्यातील रांजणगाव जवळील सोने सांगवी येथे एका गुन्ह्यातील आरोपींचा शोध घेण्यासाठी गेलेल्या पोलिसांवर आरोपींनी थेट गोळीबार केल्याची धक्कादायक घटना समोर आली आहे. पिंपरी-चिंचवड पोलिसांचे पथक कारवाईसाठी गेले असता हा प्रकार घडला. पोलिसांनीही प्रत्युत्तर देत हवेत गोळीबार स्वसंरक्षणार्थ केला. सुदैवाने या थरारात कोणीही जखमी झाले नाही.

मिळालेल्या माहितीनुसार, पिंपरी चिंचवड पोलीस दल एका गंभीर गुन्ह्यातील संशयित आरोपींच्या मागावर होते. तपासादरम्यान आरोपी सोने सांगवी( ता.शिरूर) परिसरात लपून बसल्याची माहिती पोलिसांना मिळाली होती. त्यानुसार पोलिसांनी सापळा रचला.पोलीस जवळ येत असल्याचे पाहताच दोन आरोपीनी पोलिसांच्या दिशेने थेट गोळीबार करण्यास सुरुवात केली. अचानक झालेल्या या हल्ल्यामुळे परिसरात एकच खळबळ उडाली असून संपूर्ण पुणे जिल्हा हादरला आहे. पोलिसांनीही तत्परता दाखवत स्वसंरक्षणार्थ आरोपींवर गोळीबार केला.

दोन्ही बाजूंनी झालेल्या गोळीबारानंतर आरोपींनी पोलिसांना गुंगारा देत शेजारीच असलेल्या ऊसाच्या घनदाट शेताचा आसरा घेतला आणि तेथून पलायन केले. ऊसाचे शेत मोठे असल्याने आरोपींना शोधणे पोलिसांसमोर मोठे आव्हान बनले आहे.

घटनेची माहिती मिळताच पुणे ग्रामीण पोलीस आणि पिंपरी-चिंचवड पोलिसांचे वरिष्ठ अधिकारी आणि अतिरिक्त फौजफाटा तातडीने घटनास्थळी दाखल झाला आहे. संपूर्ण सोने सांगवी परिसराला पोलिसांनी वेढा घातला असून, ऊसाच्या शेतात लपलेल्या आरोपींचा शोध घेण्यासाठी मोठी कोम्बिंग ऑपरेशन (शोध मोहीम) सुरू करण्यात आली आहे. या घटनेमुळे रांजणगाव आणि शिरूर परिसरात प्रचंड खळबळ उडाली असून नागरिकांमध्ये भीतीचे वातावरण आहे.