Pune police raid pub at 3 AM : पुणे शहरातील विमानतळ परिसरातील नामांकित 'द हौज कम्युन' (The Haus Commune) या पबवर पुणे पोलिसांच्या गुन्हे शाखेने रविवारी पहाटे तीन वाजता अचानक धाड टाकली. या छापेमारीदरम्यान पबमध्ये सर्रास पार्टी सुरू असल्याचे उघडकीस आले. प्रशासनाने रात्री दीड वाजेपर्यंतच पब सुरू ठेवण्याची परवानगी दिलेली असतानाही, हा पब पहाटे तीन वाजेपर्यंत सुरू होता.

पोलीस कारवाईच्या वेळी पबमधील डान्स फ्लोअरवर सुमारे ८० ते १०० तरुण-तरुणी बेधुंद होऊन नाचत असल्याचे दिसून आले. पोलिसांनी या सर्वांना ताब्यात घेऊन त्यांची चौकशी सुरू केली आहे. याप्रकरणी पबचालक आणि व्यवस्थापकाविरोधात गुन्हा दाखल करण्याची प्रक्रिया सुरू करण्यात आली आहे.

गुन्हे शाखेची धडक कारवाई

मिळालेल्या माहितीनुसार, विमानतळ भागातील या पबमध्ये नियमांचे उल्लंघन करून रात्री उशिरापर्यंत पार्टी सुरू असल्याची गुप्त माहिती गुन्हे शाखेला मिळाली होती. या माहितीच्या आधारे पोलिसांनी पहाटे तीनच्या सुमारास अचानक छापा टाकला. त्यावेळी अनेक तरुण-तरुणी डीजेच्या तालावर बेधुंद होऊन नृत्य करत असल्याचे पोलिसांच्या निदर्शनास आले.

कोणाच्या आशीर्वादाने पब सुरू? पोलिसांकडून चौकशी

पुणे शहरात पब आणि क्लब सुरू ठेवण्यासाठी प्रशासनाने कडक नियमावली आखून दिली असून रात्री दीड वाजेची मुदत निश्चित केली आहे. असे असतानाही पहाटे तीन वाजेपर्यंत हा पब कोणाच्या आशीर्वादाने सुरू होता, याचा तपास आता पोलीस करत आहेत. तसेच, या ठिकाणी दारू विक्रीचा अधिकृत परवाना होता की नाही, याबाबतही पब चालकाची कसून चौकशी केली जात असल्याची माहिती पोलीस सूत्रांनी दिली आहे.