अक्षय बडवे, साम टीव्ही, प्रतिनिधी

पुणे : काही दिवसांपूर्वी प्रकाश सिद्धप्पा सोनकांबळे आणि अहमद शब्बीर शेख या दोघांनी काही कारण नसताना एका व्यक्तीला दगडाने आणि धारदार शस्त्राने मारहाण केली होती. त्यानंतर त्यांनी हवेत शस्त्र फिरवून दहशत माजवण्याचा प्रयत्न केला होता. या प्रकरणी पुण्यातील बिबवेवाडी पोलीस ठाण्यात गुन्हा दाखल करण्यात आला.

मारहाण केल्यानंतर दोन्ही आरोपी फरार झाले. पोलिसांनी शोध घेऊन काल शनिवार १७ मे रोजी पर्वती टेकडी परिसरात दोघांना ताब्यात घेतले. मैत्रिणीला भेटायला जात असताना प्रकाश आणि अहमद पोलिसांच्या ताब्यात सापडले. त्यानंतर पोलिसांनी या दोघांचीही बिबवेवाडी पोलीस परिसरात वरात काढली. तेव्हाचा व्हिडीओ सोशल मीडियावर व्हायरल होत आहे. भाई होण्याचा प्रयत्न कराल, तर याद राखा असा दम पुणे पोलिसांनी दोघांना दिला आहे.

पुणे पोलिसांची मारणे गँगवर कारवाई

पुणे पोलीस मागील काही दिवसांपासून ॲक्शन मोडवर आहेत. काल पुणे पोलीस आयुक्त अमितेश कुमार यांनी गजा मारणे टोळीला दणका दिला. पुणे पोलिसांच्या गुन्हे शाखेने गजा मारणे टोळीतील सदस्यांच्या गाड्या जप्त केल्या. यात गजा मारणेच्या गाड्यांच्या समावेश असल्याचे म्हटले जात आहे.

दोन टोयोटा फॉर्च्यूनर, एक महिंद्रा थार, एक टाटा नेक्सन यांच्यासह आणखी ४ चारचाकी गाड्या जप्त पुणे पोलिसांनी जप्त केल्या आहेत. याशिवाय टोळीतील सदस्यांच्या दुचाकीसुद्धा जप्त करण्यात आल्या आहेत. आतापर्यंत पोलिसांनी मारणे टोळीच्या १० ते १५ गाड्या जप्त केल्या आहेत. मारणे टोळीवर पोलिसांची बारीक नजर आहे.