अक्षय बडवे, साम टीव्ही

पुण्यातील पोलीस दलातून मोठी बातमी हाती आली आहे. पुण्यातील खंडणी प्रकरणात गुन्हा दाखल झालेले पोलीस दलातील तीन कर्मचाऱ्यांना बडतर्फ करण्यात आलं आहे. ३ पोलीस कर्मचाऱ्यांना बडतर्फ केल्याने विभागात एकच खळबळ उडाली आहे.

पुण्यातील खंडणी प्रकरणात तीन पोलीस कर्मचाऱ्यांवर गुन्हा दाखल करण्यात आला होता. आता या पोलीस कर्मचाऱ्यांवर कारवाई सुरू झाली आहे. पोलीस उपनिरीक्षक अजित बडे, दामिनी मार्शल सोनाली हिंगे आणि कर्मचारी सुदाम तायडे असे बडतर्फ केलेल्या अधिकारी आणि कर्मचाऱ्यांची नावे आहेत. तिघेही शिवाजीनगर पोलीस ठाणे आणि सायबर पोलीस ठाण्यात कार्यरत होते.

पुण्यातील प्राचार्यांना अटकेची भीती दाखवत तिघांनी तब्बल ७ लाख रुपये उकळले होते. प्राचार्यांनी पोलिस उपनिरीक्षक अजित बडे, दामिनी मार्शल सोनाली हिंगे आणि कर्मचारी सुदाम तायडे या तिघांवर आरोप केला होता. तिघांनी मिळून संबंधित प्राचार्यांना गुन्ह्यात अडकवण्याची आणि अटक करण्याची भीती दाखवली. आता याच प्रकरणात पोलीस विभागाने तिघांवर मोठी कारवाई केली. कारवाईमुळे पोलिस विभागात मोठी खळबळ उडाली आहे.

2 वरिष्ठ पोलीस अधिकाऱ्यांचे तडकाफडकी निलंबन

पुण्यातील २ वरिष्ठ पोलीस अधिकाऱ्यांचं निलंबन करण्यात आलं आहे. लाचखोर प्रकरणात दोघांवर कारवाई करण्यात आली. एपीआय वैशाली तोटेवार आणि पीएसआय मनोज बरूरे यांचं निलंबन करण्यात आलं आहे. लाचलुचपत प्रतिबंधक विभागाने लाचखोर पोलीस अधिकाऱ्यांना रंगेहाथ पकडलं होतं. त्यानंतर आज मंगळवारी दोघांनाही पुणे शहर पोलिस दलातून निलंबित करण्यात आलं आहे. यो दोन्ही पोलीस अधिकाऱ्यांना वेगवेगळ्या ठिकाणी लाच घेताना अटक करण्यात आली.

वैशाली तोटेवारांना १ मे रोजी पोलिस निरीक्षक, लोहमार्ग, मुंबई या पदावरून रूजू होण्यासाठी पदोन्नतीवर कार्यमुक्त करण्यात आलं होतं. तोटेवार यांनी खासगी व्यक्तीच्या माध्यमातून कोंडऱ्याड हॉटेलच्या परिसरात २७ लाख रुपयांची लाच स्वीकारली होती. तुमची बेईमानी वृत्ती येते, असं म्हणत पोलिस सहआयुक्त रंजनकुमार शर्मा यांनी त्यांना निलंबित केलं. पोलीस उपनिरीक्षक मनोज बरुरे ८० हजारांची लाच स्वीकारताना पकडले गेले.