संजय जाधव

Latest Pune News : घरगुती गॅस संदर्भात पुणेकरांची चिंता वाढवणारी बातमी आहे.घरगुती गॅस सिलिंडरचा काळाबाजार करणाऱ्या टोळीला पुणे पोलिसांच्या गुन्हे शाखेने अटक केलीय.हे घरगुती सिलिंडरमधून गॅस चोरत होते.

घरगुती वापराच्या सिलेंडरमधील गॅस काढून तो व्यावसायिक सिलेंडर मध्ये भरून काळाबाजार करणाऱ्या रॅकेटचा पुणे (Pune) पोलिसांच्या गुन्हे शाखेच्या पथकाने पर्दाफाश केलाय. पुण्यातील सिंहगड रस्ता परिसरातील वडगाव बुद्रुकमध्ये ही कारवाई करण्यात आली. (Latest Marathi News)

ज्यांच्यावर घरोघरी गॅस देण्याची जबाबदारी होती त्यांनीच अशा प्रकारे गॅसचा हा काळाबाजार केल्याचा धक्कादायक प्रकार उघडकीस आला आहे. एचपी गॅस व भारत पेट्रोलियम गॅस कंपनीचे घरगुती वापराच्या गॅस सिलेंडरमधून गॅस काढून तो व्यावसायिक वापराच्या गॅस सिलेंडरमध्ये (Gas Cylinder)या ठिकाणी भरला जात होता.

खरंतर हा संपूर्ण प्रकार बेकायदा आणि धोकादायकही आहे. पोलिसांनी या ठिकाणाहून चार जणांना अटक केली असून ११४ गॅस सिलेंडर ही जप्त केले आहेत. दरम्यान, काही महिन्यांपूर्वी सातारा रस्त्यावरील एका गोदामात देखील अशाच प्रकारे बेकायदेशीरपणे घरगुती गॅस सिलेंडरमधून व्यावसायिक सिलेंडरमध्ये गॅस भरले जात होते.

त्यावेळी या ठिकाणी मोठी आग लागली होती. अशा प्रकारचे धोकादायक काम कुठे सुरू असल्याचे आढळल्यास नागरिकांनी जवळच्या पोलीस ठाण्यात तक्रार करावी असे आवाहनही पोलिसांकडून करण्यात आले. त्यामुळे पुणेकरांनो तुमच्या घरीही असा गॅस येत नाही ना याचीही खात्रजमा करा.