गोपाल मोटघरे, साम टिव्ही

पुण्याच्या पिंपरी चिंचवडमधून एक दुर्देवी घटना समोर आली आहे. पाण्याच्या टाकीत पडून एका विवाहित महिलेचा मृत्यू झाला आहे. ही संपूर्ण घटना सीसीटीव्ही कॅमेऱ्यात कैद झाली आहे. काल सायंकाळच्या सुमारास ही घटना घडली असल्याची माहिती आहे. दरम्यान, या घटनेची माहिती मिळताच पिंपरी चिंचवड महापालिकेच्या अग्निशमन दलाने घटनास्थळी धाव घेतली. तसेच महिलेचा मृतदेह टाकीतून बाहेर काढला.

आशाबाई ढोणे (वय वर्ष ४६) असे मृत महिलेचे नाव आहे. मिळालेल्या माहितीनुसार, ही घटना पिंपरी चिंचवड शहरातील डूडूळगाव परिसरातील यशदा स्प्लेंडर पार्क सोसायटीमध्ये घडली. सायंकाळच्या सुमारास आशाबाई या पार्किंग परिसरातून झाडू घेऊन केर काढत होत्या. केर लोटत त्या पुढे गेल्या.

दरम्यान, केर लोटत आशाबाई पाण्याच्या टाकीजवळ गेल्या. पाण्याच्या टाकीला झाकण नव्हते. टाकीजवळ आशाबाई झाडू घेऊन उभ्या होत्या. अचानक एक पाय त्यांचा टाकीत गेला, ते थेट खाली कोसळल्या. पाण्याने भरलेल्या टाकीत पडल्याने आशाताईंचा गुदमरून मृत्यू झाला. त्यांनी मदतीसाठी हाक दिली. मात्र, मदत मिळण्यापूर्वीच त्यांचा मृत्यू झाला.

या घटनेची माहिती मिळताच पिंपरी चिंचवड महापालिकेच्या अग्निशमन दलाने घटनास्थळी धाव घेतली. तसेच आशाबाई यांचा मृतदेह पाण्याच्या टाकीतून बाहेर काढला. तसेच शवविच्छेदनासाठी रूग्णालयात पाठवला. या घटनेनंतर ढोणे कुटुंबावर दुखा:चा डोंगर कोसळला असून, या प्रकरणात नेमकी कुणावर कारवाई होते? हे पाहणं महत्त्वाचं ठरेल.