अक्षय बडवे, साम टीव्ही, प्रतिनिधी

Pune News : महाराष्ट्राचा अभिमान असलेल्या मर्दानी खेळाने आता आंतरराष्ट्रीय सीमा ओलांडल्या आहेत. ऐतिहासिक महत्त्व असलेली ही युद्धकला थेट जर्मनीपर्यंत पोहोचली आहे. पुण्यातील छत्रपती शिवाजीनगर गावठाण येथील श्री शिवाजीराजे मर्दानी आखाडा येथे प्रशिक्षण घेतल्यानंतर जर्मन तरुणीने जर्मनीमध्ये मर्दानी खेळाचे वर्ग सुरु केले आहे.

मिळालेल्या माहितीनुसार, जर्मन तरुणी लटोया वाईल्डला महाराष्ट्रातील मर्दानी खेळाची प्रचंड आवड निर्माण झाली होती. लटोया ही प्रथम पुण्यात येऊन मर्दानी खेळाचे प्रशिक्षण घेतले. ती गणपती आगमन आणि विसर्जन मिरवणुकीतही सहभागी झाली होती. पुण्याहून जर्मनीला परतल्यानंतर लटोयाने ऑनलाइन माध्यमातून आखाड्यासोबत सराव सुरु ठेवला.

लटोया वाईल्डच्या या आवडीमुळेच तिच्या जर्मनीमध्ये शिवजयंती उत्सव आणि छावा चित्रपटाच्या प्रीमियरच्या वेळी लटोया वाईल्डने मर्दानी खेळाची थरारक प्रात्यक्षिके सादर केली होती. याला जर्मनीमधील नागरिकांचा उत्तम प्रतिसाद मिळाला होती. तेथील काही स्थानिक नागरिकांनी मर्दानी खेळ शिकण्याची लटोयाकडे मागणी केली होती.

स्थानिक नागरिकांच्या मर्दानी खेळ शिकण्याच्या मागणीवरुन लटोया वाईल्डने पुण्यातील श्री शिवाजीराजे मर्दानी आखाडा यांच्या सहकार्याने जर्मनीत अधिकृत मर्दानी खेळ प्रशिक्षण वर्ग सुरू केला आहे. यामुळे मर्दानी खेळाचा प्रचार व प्रसार भारताबाहेरच्या पहिल्या शाखेद्वारे अधिकृतपणे सुरू झाला आहे.