Actress : प्रसिद्ध अभिनेत्रीचे निधन, कॅन्सरशी झुंज ठरली अपयशी; मनोरंजन विश्वावर शोककळा

Actress Death News : मनोरंजन विश्वातून एक दु:खद बातमी समोर आली आहे. जेष्ठ अभिनेत्री बसंती चॅटर्जी यांचे त्यांच्या राहत्या घरी निधन झाले आहे. त्यांनी ८८ व्या वर्षी अखेरचा श्वास घेतला. बऱ्याच कालावधीपासून बसंती चॅटर्जी कॅन्सर या गंभीर आजाराशी झुंज देत होत्या. मागील काही महिन्यांमध्ये आजारपणामुळे त्यांची प्रकृती खालावली होती. बुधवारी (१३ ऑगस्ट) पहाटे त्यांची प्राणज्योत मालवली.

बसंती चॅटर्जी यांनी बंगाली चित्रपटसृष्टीत खूप काम केले होते. ५० वर्षांपेक्षा जास्त कारकिर्दीत त्यांनी १०० हून अधिक चित्रपटांमध्ये त्यांनी काम केले होते. फक्त चित्रपटच नाही, तर टीव्ही मालिकांमध्येही बसंती चॅटर्जी झळकल्या होत्या. गीता एलएलबी या मालिकेच्या शूटिंगदरम्यान त्यांची तब्येत अचानक बिघडली. त्यानंतर त्यांनी काम करणे बंद केले.

गेल्या काही वर्षांपासून बसंती चॅटर्जी कर्करोगाचा सामना करत होत्या. रुग्णालयातील आयसीयूमध्ये त्यांच्यावर उपचार सुरु होते. त्यानंतर डॉक्टरांच्या सल्ल्यानुसार, त्यांना घरी आणण्यात आले होते. देखरेखीसाठी बसंती चॅटर्जी यांच्या घरी नर्स होती. मागील काही दिवसात त्यांची प्रकृती खालावली होती. अशा परिस्थितीतही त्या अभिनयाशी जोडलेल्या होत्या.

बसंती चॅटर्जी यांचा प्रवास रंगभूमीपासून झाला. सुरुवातीच्या काळात त्या रंगमंचावर काम करत असत. नाटकांमध्ये काम करण्याचा अनुभवाचा फायदा त्यांना झाला. यामुळे सिनेमाच्या पडद्यावर त्यांना वेगळी ओळख मिळाली होती. बसंती चॅटर्जी यांच्या निधनाने बंगाली चित्रपटसृष्टीत शोककळा पसरली आहे. चाहत्यांनीही चॅटर्जी यांनी श्रद्धांजली वाहिली आहे.