पुणेकरांसाठी मोठी बातमी समोर आली आहे. पुणे ग्रामीण घटकातील लोणावळा ग्रामीण हद्दीत मावळ तालुक्यात मौजे वेहेरेगावी येथे श्री एकविरा देवीची चैत्र यात्रा होणार आहे. या यात्रेसाठी अनेक भक्त दर्शनासाठी येतात. या पार्श्वभुमीवर कायदा व सुव्यवस्था अबाधित राहण्यासाठी २६ मार्च रोजी रात्री १२ वाजेपर्यंत सर्व प्रकारची वाहतूक पर्यायी मार्गाने वळविण्याबाबतचे आदेश जिल्हाधिकारी तथा जिल्हादंडाधिकारी जितेंद्र डुडी यांनी दिले आहेत.

कार्ला फाटाकडून एकवीरा पायथा मंदीराकडे जाणाऱ्या वाहतुकीस मनाई करण्यात आली आहे. कार्ला फाटा ते एकवीरा मंदिराच्या पायथापर्यंत जाणारी वाहने अग्रसेन हॉटेल वाहनतळ, लाजवंती महाविद्यालय वाहनतळ, दुर्गा परमेश्वरी वाहनतळ येथे लावण्याचे आदेश देण्यात आले आहेत.

उद्या म्हणजेच २५ मार्चच्या मध्यरात्री १२ वाजल्यापासून ते दुसऱ्यादिवशी रात्री १२ वाजेपर्यंत जुना पुणे मुंबई महामार्गावरील वडगाव फाटा ते कुसगाव बु, टोलनाका दरम्यान जड वाहतूक बंद करण्यात येणार आहे. ही वाहतूक वडगाव फाटा ते मुंबई-पुणे महामार्गाने कुसगाव बु. टोलनाका, मुंबई अशी वळविण्यात येणार आहे.

जुना पुणे मुंबई महामार्गावरील कुसगाव बु, टोलनाका ते वडगाव फाटा दरम्यान जड वाहतूक बंद करण्यात येत असून ही वाहतूक पुढे कुसगाव बु. टोलनाका ते वडगाव फाटा मुंबई-पुणे महामार्गाने वडगाव फाटा, पुणे अशी वळविण्यात येत आहे. जड व अवजड वाहने (भाविकांची हलकी वाहने वगळून) सर्व प्रकारची वाहतूक पर्यायी मार्गाने वळविण्याबाबत जिल्हाधिकारी श्री. डुडी यांनी केले आहे. त्यामुळे नागरिकांनी घराबाहेर पडण्यापूर्वी नियोजन करण्याचे आवाहन करण्यात आले आहे.