सचिन जाधव, पुणे

Pune Hadpasar ACB Caught Red Handed Ramchandra Londhe पुण्यातून धक्कादायक बातमी समोर आली आहे. लाचलुचपत प्रतिबंधक विभागाच्या (ACB ) पुणे पथकाने महावितरणच्या हडपसर उपविभाग-२ कार्यालयातील अतिरिक्त कार्यकारी अधिकाऱ्याला लाच स्वीकारताना रंगेहाथ पकडले असल्याची घटना घडली आहे. रामचंद्र नारायण लोंढे (वय ४२) असे या अधिकाऱ्याचं नाव असून त्याने वीजमीटर जोडणीच्या कामासाठी मंजुरी देण्यासाठी ७ हजार ५०० रुपयांची लाच घेतल्याचे म्हटले जात आहे. दरम्यान एसीबीने गुरुवारी दुपारी हडपसर येथील महावितरण कार्यालयात ही कारवाई केली.

मिळालेल्या माहितीनुसार, तक्रारदार हे इलेक्ट्रिकल सब-कॉन्ट्रॅक्टर असून ते महावितरणची विविध कामे करतात. त्यांनी नव्याने १२ वीजमीटर जोडणीच्या कामासाठी मंजुरी व प्रक्रिया पूर्ण करण्यासाठी लोंढे यांच्याकडे धाव घेतली. मात्र त्या बदल्यात प्रतिमीटर एक हजार रुपये या प्रमाणे एकूण १२ हजार रुपयांच्या लाचेची मागणी करण्यात आल्याची तक्रार त्यांनी २ जून रोजी एसीबीकडे केली होती.

तक्रारीमध्ये आणखी एक गंभीर आरोप करण्यात आला होता. एका इमारतीच्या वीज जोडणीसंदर्भातील कामासाठी तब्बल ५० हजार रुपयांची मागणी करण्यात आल्याचे तक्रारदाराने नमूद केले होते. या तक्रारीनंतर एसीबीने प्राथमिक पडताळणी केली असता लाच मागितल्याच्या आरोपांमध्ये तथ्य असल्याचे समोर आले. पडताळणीदरम्यान अतिरिक्त कार्यकारी अभियंता लोंढे यांनी १२ हजार रुपयांच्या लाचेपैकी ४ हजार ५०० रुपये यापूर्वी स्वीकारल्याचे मान्य केल्याची माहिती एसीबीने दिली.

तसेच उर्वरित ७ हजार ५०० रुपयांची मागणी केल्याचेही पडताळणीत स्पष्ट झाले. त्यानंतर एसीबीने सापळा रचून नियोजनबद्ध कारवाई केली. गुरुवारी दुपारी तक्रारदाराकडून ७ हजार ५०० रुपयांची लाच स्वीकारताना लोंढे यांना हडपसर उपविभाग-२ कार्यालयात रंगेहात पकडण्यात आले. या कारवाईमुळे महावितरणच्या वर्तुळात मोठी खळबळ उडाली असून सरकारी कार्यालयांमधील भ्रष्टाचाराचा मुद्दा पुन्हा एकदा ऐरणीवर आला आहे. या कारवाईचे नेतृत्व पोलीस निरीक्षक अविनाश घरबुडे यांनी केले. तर पुढील तपास पोलीस निरीक्षक सुहास हट्टेकर करीत आहेत. आरोपीला ताब्यात घेण्यात आले असून त्याच्याविरुद्ध भ्रष्टाचार प्रतिबंधक कायदा, १९८८ अंतर्गत फुरसुंगी पोलीस ठाण्यात गुन्हा दाखल करण्याची प्रक्रिया सुरू आहे.