पुण्यातील कुख्यात गुंड शाहरुख शेखचा काही दिवसांपूर्वी सोलापूर येथे एन्काउंट झाला होता. या घटनेनंतर पुणे शहर पोलीस आयुक्त अमितेश कुमार यांनी मोठा निर्णय घेतला आहे. गुन्हे शाखेच्या युनिट ६ पथकाने शाहरुखला शोधून काढत कारवाई केली होती. त्यांच्या धाडसी कामगिरीचे कौतुक करत आयुक्तांनी त्यांना १ लाख रुपयांचे बक्षीस जाहीर केले आहे.

शाहरुख शेख हा पुण्यात सराईत गुन्हेगारांपैकी एक होता. त्याच्या विरोधात खून, दरोडा, गोळीबार यांसारखे अनेक गंभीर गुन्हे दाखल झाले होते. पोलिसांना गुंगारा देत शाहरुख सोलापूर जिल्ह्यातील लांबोटी गावात आपल्या नातेवाईकांकडे लपून बसला होता. त्याच्या नातेवाईकांनी याबाबतची माहिती पोलिसांना दिली. त्यानंतर गुन्हे शाखेच्या युनिट ६ चे पथक तात्काळ सोलापूरकडे रवाना झाले.

गुन्हे शाखेच्या पथकाने शाहरुख ज्या ठिकाणी लपला होता, त्या ठिकाणी धाड टाकली. पोलिसांना पाहताच शाहरुखने गोळीबार करण्यास सुरुवात केली. परिस्थितीचा अंदाज घेत पोलिसांनी स्वसंरक्षणार्थ प्रत्युत्तरात गोळीबार केला. या गोळीबारादरम्यान शाहरुख खानला चार गोळ्या लागल्या. एन्काउंटरमध्ये तो जागीच ठार झाला.

शाहरुखचे एन्काउंट करणाऱ्या पोलिसांना १ लाख रुपयांचे बक्षीस पुणे पोलीस आयुक्त अमितेश कुमार यांनी दिले आहे. पुणे गुन्हे शाखेच्या युनिट ६ च्या पथकाला आयुक्तांकडून बक्षीस मिळाले आहे. सोलापूरमध्ये शाहरुख खानचा एन्काउंट गुन्हे शाखेच्या युनिट ६ ने केला होता. या कारवाईमुळे पोलिसांचे कौतुक केले जात आहे.