Doomsday Fish : त्सुनामी अन् विध्वंसक भूकंपाचे संकट, समुद्रातून मिळाले संकेत, पाहा व्हिडिओ

Video : महासागरात खोलवर असे अनेक रहस्यमय प्राणी राहतात, अशा अनेक प्राण्यांबद्दल आपल्याला फारशी माहिती नसते. असाच एक प्राणी म्हणजे ओअरफिश. या माश्याला 'डूम्सडे फिश' म्हणून देखील ओळखले जाते. हा मासा खोलवर राहणे पसंत करतो, त्याची झलक खूपच दुर्मिळ आहे. पण जेव्हाही ओअरफिश पृष्ठभागावर येतो तेव्हा संकट येणार असे मानले जाते.

काही दिवसांपूर्वी तामिळनाडूच्या समुद्रकिनाऱ्यावर मासेमारी करणाऱ्यांनी हा अनोखा मासा पकडला चांदेरी रंगाचे शरीर, लहरी आकार आणि डोक्याजवळ लाल कंगव्यासारखे पंख असा आगळावेगळा मासा पाहून सर्वांना आश्चर्य वाटले होते. हा मासा समुद्रात २०० ते १००० मीटर खोलीवर राहतो, त्याची लांबी ३० फूटांपर्यंत जाऊ शकते. त्याचे समुद्राच्या पृष्ठभागावर येणे फक्त दुर्मिळच नाही, तर धक्कादायक देखील मानले जाते. या घटनेचा व्हिडीओ सोशल मीडियावर व्हायरल होत आहे. व्हिडीओच्या कॅप्शनमध्ये तामिळनाडूमध्ये 'डूम्सडे फिश' आढळला असे म्हटले आहे.

ओअरफिशचे दिसणे म्हणजे एखाद्या मोठ्या नैसर्गिक आपत्तीचे आगमन होणे असा वर्षानुवर्ष समज आहे. याबाबत सर्वात प्रसिद्ध घटना २०११ मध्ये घडली होती. जपानमध्ये भयानक भूकंप आणि त्सुनामीपूर्वी समुद्रकिनाऱ्यावर अनेक ओअरफिश मृतावस्थेत आढळले होते. त्यानंतर या माशांचा जमिनीखाली होणाऱ्या हालचालींशी काही गूढ संबंंध असू शकतो असा समज अधिक दृढ झाला. यामुळेच ओअरफिशला 'डूम्सडे फिश' असे नाव पडले.

ओअरफिशचे पृष्ठभागावर येणे हे समुद्राखाली काही मोठी हालचाल होत असल्याचे संकेत देते. त्यामुळे याला नैसर्गिक इशारा म्हणून पाहिले जाते. फक्त जपानच नाही, तर ओअरफिश दिसल्यानंतर काही काळाने मेक्सिकोमध्येही भूकंप झाला होता. आता हा मासा भारतातील तामिळनाडूमध्ये दिसला आहे. तेव्हा ही घटना नैसर्गिक आपत्तीचे संकेत देत आहे अशी भीती लोकांच्या मनात आहे.