सचिन जाधव, प्रतिनिधी

Pune Fraud News:

ऑनलाईन व्यवहार वाढल्याने ऑनलाईन फसवणुकीचे गुन्हेही वाढले आहेत. पुणे शहरात ऑनलाईन फसवणूकीचे प्रकार वारंवार समोर येत आहेत. नुकताच पुण्यातील फेक ऑनलाईन कंपनीचा अजब प्रताप समोर आला असून गुंतवणुकीच्या आमिषाने तब्बल १०० कोटींची फसवणूक झाल्याचे उघड झाले आहे.

याबाबत अधिक माहिती अशी की, खोटी कंपनी स्थापन करुन त्यामध्ये गुंतवणूक केल्यास मोठा परतावा देण्याच्या आमिषाने तब्बल १०० कोटींची फसवणूक केल्याचे प्रकरण पुण्यात उघडकीस आले. या प्रकरणात ईडीकडून (ED) पुण्यातील भारती विद्यापीठ पोलीस स्टेशनमध्ये गुन्हा दाखल करण्यात आला आहे.

2020 मध्ये पुण्यातील आंबेगाव परिसरात फ्रॉड ऑनलाईन कंपनी सुरू करत ही गुंतवणूक करण्यात आली होती. या फसवणूक प्रकरणात एकूण पाच जणांवर गुन्हा दाखल करण्यात आला आहे. धक्कादायक बाब म्हणजे वेगवेगळ्या बँक अकाउंटमध्ये पैसे घेत हवालामार्फत ही सगळी रक्कम परदेशात ट्रान्सफर केले असल्याची माहिती ईडीकडून देण्यात आली आहे.

या प्रकरणाने शहरात एकच खळबळ उडाली असून मुख्य आरोपी आणि कंपनीचा मालक दुबईला पळून गेला असल्याचेही सांगण्यात येत आहे. आरोपींच्या तपासासाठी पोलीस पथके रवाना करण्यात आली आहेत. (Latest Marathi News)