सागर आव्हाड, पुणे

पुणे जिल्ह्यातील पूर्व हवेली तालुक्यातील अष्टापूर परिसरात आज पहाटे एक धक्कादायक घटना घडली आहे. पन्नास वर्षीय महिलेवर बिबट्याने थेट हल्ला केला. सुदैवाने महिलेनं प्रसंगावधान राखत आरडा-ओरड करत जीव वाचवला. महिलेला तातडीने वैद्यकीय उपचारासाठी हलवण्यात आलं आहे. सध्या त्यांची प्रकृती स्थिर आहे. जखमी महिलेचं नाव अंजना कोतवाल असे आहे.

अष्टापूर येथील अंजना वाल्मीक कोतवाल या आज पहाटे दशक्रिया विधीसाठी घराबाहेर पडल्या. तेव्हाच अंधाराचा फायदा घेत दबा धरून बसलेल्या बिबट्यानं त्यांच्या पायावर प्रथम हल्ला चढवला. सुरुवातीला हा कुत्र्याचा हल्ला असल्याचं त्यांना वाटलं. पण त्या दगड उचलण्यासाठी खाली वाकल्या, तेवढ्यात बिबट्यानं थेट त्यांच्या डोक्यावर झेप घेतली.

अचानक झालेल्या हल्ल्यानंतर त्या गोंधळल्या. त्यांनी जोरदार आरडा-ओरडा करत मदतीसाठी हाका मारल्या. त्यांच्या ओरडण्याने बिबट्या घाबरला आणि पळून गेला. पहाटे पहाटे अंजना यांच्या ओरडण्याने नागरिकांनी आणि कुटुंबीयांनी घटनास्थळी धाव घेतली. त्यांचा आवाज ऐकून सगळे जागे झाले. घटनास्थळी आलेल्या गावकऱ्यांना आणि कुटुंबियांना बिबट्या पळताना दिसला. जखमी झालेल्या अंजना यांना तातडीने कुटुंबीयांनी वैद्यकीय उपचारासाठी हलवण्यात आलं.

सध्या त्यांची प्रकृती स्थिर असून या परिसरात बिबट्याच्या हालचाली वाढल्याने नागरिकांमध्ये भीतीचं वातावरण आहे. वनविभागानं घटनास्थळी भेट देऊन शोधमोहीम सुरू केली आहे.अष्टापूरमध्ये झालेल्या या हल्ल्यानंतर प्रशासनाकडून सतर्कतेचे आवाहन करण्यात आले आहे. नागरिकांना पहाटे आणि रात्री बाहेर पडताना विशेष काळजी घेण्याचं आवाहन वनविभागानं केलं आहे.