मुंबईच्या धावत्या खोपोली लोकलमध्ये एका तरुणीचा विनयभंग झाल्याची घटना ताजी असतानाच हैदराबादहून पुण्याला येणाऱ्या धावत्या स्लीपर बसमध्ये महिलेचा विनयभंग झाला असल्याची संतापजनक घटना घडली आहे. धक्कादायक म्हणजे, महिला आपल्या पतीसोबत प्रवास करत असतानाच हा प्रकार घडला. मात्र, हडपसर पोलिसांनी तत्परता दाखवत काही तासांत आरोपीला बेड्या ठोकल्या.

मिळालेल्या माहितीनुसार, पीडित महिला ९ फेब्रुवारी रोजी रात्री १० वाजता हैदराबाद येथून एका खासगी बसने पुण्यातील हडपसरच्या दिशेने येत होती. महिला आणि तिचा नवरा स्लीपर सीटवर झोपलेले होते. पहाटेच्या सुमारास बसमध्ये उपस्थित असलेल्या निशीत कुमार यशवंत सिंग याने पीडितेसोबत अश्लील कृत्य केले.

आरोपीच्या या घाणेरड्या कृत्यामुळे महिला दचकून जागी झाली आणि तिने प्रसंगावधान राखून गपचूप या घटनेचे आपल्या मोबाईलमध्ये व्हिडिओ चित्रीकरण केले. बस पुण्यात आल्यानंतर पीडित महिलेने हडपसर पोलीस ठाण्यात धाव घेऊन तक्रार नोंदवली.

पोलिसांनी तातडीने तपासाची चक्रे वेगाने फिरवली. पीडितेने दिलेला व्हिडिओ पुरावा म्हणून ग्राह्य धरत पोलिसांनी आरोपी निशीत कुमारला अटक केली. हडपसर पोलिसांनी या प्रकरणी २४ तासांच्या आत तपास पूर्ण करून न्यायालयात दोषारोपपत्र सादर केले आहे. पोलिसांच्या तत्परतेचं कौतुक होत आहे.