• पुण्यात जनगणना करणाऱ्या महिला कर्मचाऱ्याला मारहाण

• महिला कर्मचाऱ्याला शिवीगाळ आणि मारहाण

• स्वारगेट पोलीस ठाण्यात गुन्हा दाखल

• पुणे महापालिका कर्मचाऱ्यावर हल्ला

पुण्यात जनगणना करणाऱ्या महिला कर्मचाऱ्याला मारहाण करण्यात आल्याची धक्कादायक घटना घडली. जनगणना करायला गेलेल्या महिला कर्मचाऱ्याला ५ ते १० जणांनी शिवीगाळ करत मारहाण केली. पुण्यातील महर्षीनगरमध्ये ही धक्कादायक घटना घडली. स्वारगेट पोलिस ठाण्यात याप्रकरणी गुन्हा दाखल करण्यात आली. पुणे महापालिकेत काम करणाऱ्या महिला कर्मचाऱ्यांनी पोलिसात तक्रार दाखल केली. याप्रकरणी स्वारगेट पोलिस ठाण्यात गुन्हा दाखल करण्यात आला आहे.

यावरून विकास मोरे क्रांती मोरे मुक्ता कसबे लीलावती मोरे अभिजीत मोरे व इतर अनोळखी पाच महिला व पुरुष यांच्यावर गुन्हा दाखल करण्यात आला आहे. पोलिसांनी दिलेल्या माहितीनुसार ही सगळी घटना 27 मे रोजी दुपारी तीन ते साडेचार दरम्यान मीनाताई ठाकरे वसाहत या ठिकाणी घडली.

यातील तक्रारदार या पुणे महानगरपालिकेच्या कर्मचारी असून सध्या सुरू असलेल्या जनगणनेच्या कामासाठी कार्यरत आहेत. 27 मे रोजी दुपारी तीन वाजण्याच्या सुमारास फिर्यादी या मीनाताई ठाकरे वसाहत या ठिकाणी जनगणनेच काम करत असताना आरोपी विकास मोरे यांची पत्नी क्रांती मोरे बहीण मुक्ता कसबे पुतण्या अभिजीत मोरे या सर्वांनी मिळून त्यांना काम करत असताना अडथळा निर्माण केला आणि त्यांना शिवीगाळ करायला सुरुवात केली.

आज फिर्यादी पुन्हा एकदा त्या भागात जनगणनेचे काम करण्यास गेले असता त्यांनी काल झालेल्या प्रकरणानंतर संबंधित कुटुंबाची समजूत काढण्याचा प्रयत्न केला. मात्र काल झालेल्या भांडणाच्या रागातून मोरे कुटुंबीयांनी फिर्यादी यांच्या पाठीमागून येऊन त्यांना दगडाने मारहाण करून लाथा बुक्क्या देखील मारल्या अशी फिर्याद फिर्यादी यांनी पोलिसात दिली आहे. यावरून पोलिसांनी आता गुन्हा दाखल केला असून पुढील कारवाई सुरू आहे.