अक्षय बडवे, साम टिव्ही

पुण्यात गुन्हेगारी घटनांमध्ये वाढ होत असल्याचं चित्र आहे. अशातच हॉटेलमधील मारहाणीच्या घटनेमुळे परिसरात खळबळ उडाली आहे. हॉटेलच्या वेटर आणि मालकाकडून २ तरूणांना मारहाण करण्यात आली आहे. मारहाणीची संपूर्ण घटना सीसीटीव्ही कॅमेऱ्यात कैद झाली आहे. या मारहाणप्रकरणी पोलिसांनी चार जणांविरोधात गुन्हा दाखल केला आहे.

मिळालेल्या माहितीनुसार, ही धक्कादायक घटना पुण्याजवळील मांजरी येथील हॉटेल हॅप्पी पंजाब येथे घडली. आशिष भगत आणि त्याच्या मित्राला बेदम मारहाण करण्यात आली. घटनेच्या दिवशी आशिष भगत आणि त्याचा मित्र पुण्यातील बेलेकर वस्ती या परिसरात असलेल्या हॉटेलमध्ये जेवायला गेले होते.

जेवण झाल्यानंतर गेट उघडायला सांगितल्यानंतर वेटरने वाद घालण्यास सुरूवात केली. वाद विकोपाला गेला. वादाचं रूपांतर जोरदार हाणामारीत झालं. वेटर आणि हॉटेल मालकाने मिळून दोघांना बेदम मारहाण केली. या हाणामारीत भगत आणि त्याचा मित्र गंभीर जखमी झाले असून, हा संपूर्ण प्रकार सीसीटीव्हीत कैद झाला आहे.

या मारहाण प्रकरणानंतर दोघांनीही हडपसर पोलीस ठाण्यात धाव घेतली. तसेच तक्रार दाखल केली. या मारहाण प्रकरणी पोलिसांनी चार जणांविरोधात गुन्हा दाखल केला. आता पोलीस आरोपींवर काय कारवाई करणार? हे पाहणं महत्वाचं ठरेल. दरम्यान, या घटनेनंतर पुण्यात खळबळ उडाली असून, गु्न्हेगारी घटनांमध्ये वाढ होत असल्यामुळे नागरिकांनी चिंता व्यक्त केली.